PM Modi-i Meghalaya nüboyimba nung shilem agitsü akok

Shillong, August 10 (Agencies): BJP national otongdar, Nalin Kohli-i ashiba agi, parnoki Taruba küm Meghalaya nung assembly election atema nüboyimtsü asoshi Ato Kilonser Narendra Modi anir arutsü merangtsü.
“Meghalaya nung taruba küm election nung nüboyimba sentong nung shilem agitsü asoshi onoki Ato Kiloner anri arutsü merangtsü kechiyong ibaji party atema kanga dang teyari tulu asütsü,” ta Kholi-i osangbenertem dang ashi.
Meghalaya election nung BJP tir, Amit Shah indang shilem indang asüngdang dang, BJP national otongdar-i ashiba agi, BJP tir-i Meghalaya nung taruba election atema sentongtem ajak asadanga pa ketdangsüba nung inyaktsü.
Paisa ashiba agi, Meghalaya nung nüboyimba sentong achaayangtsü atema party tiri telok ka tentetogo.
“Onok party tiri August ita tetenzüklen Meghlaya semdangtsü asoshi liasü, saka pa maparen aika aliba ajanga iba sentong thinentsüsa aküm. Ajisüaka pai meghalaya yakta mashi mapang ka nung semdangtsü,” ta otongdar-isa ashi.
Kasa mapang nung Kohli-i ashiba agi, Himanta Biswa Sarma ya Congress nungi BJP atema sempet tajungtiba lir.
“Himanta-i party atema Assam aser Manipur nung election koktsüogo. Meghalaya nunga pai takok bener arutsü,” ta Kohli-i ashi.