Slash o Axl Rose na tangatettep kati arur asü?

August 23, 2015: Guns ‘n’ Roses kentener telok nung kentensang Axl Rose aser guitar atemsang Slash na 1996 küm nungi o mejembi arur.
Ajisüaka Slash-i Guns ‘n’ Roses toktsür küm 20 shi lia aruba sülen joko tena o jembidar, ta osang kar ajanga metetdaktsüogo.
Sweden nunger website, Aftonblade den interview ka agiba mapang, Slash-i, küna tesüiba mapang jashitepba terabo amadokogo saka ozü telok tanaben lungjemtsü atemabo ano kecha sentong mali, ta ashi.
Slash dang Rose nena joko medemer kümer asü, ta asüngdangba mapang, pai, “Küna tesendaktep yanglutsüji kodang’ar meshiteti liasü, ajisüaka mapang talangka mangatettepi aruba angatettepa akümba ya junger,” ta langzüa liasü.
Süra tangatettep tajung kati arura ner telok ano tanaben lungjemtettsü asü ta asüngdangba langzüdang Slash-i, “Oh, ni ibajibo melangzütettsü. Iba onükjibo asenoki rasaa mejembili, kechiba süra iba otsü ya joko kanga tejen kümogo,” ta ashi.
Tena tesüsa jembibaji küm ter Guns ‘n’ Roses nung külemi dena arur 1996 küm October ita nung Slash-i telok toktsüdang jembiba liasü.
2012 küm ‘Rock & Roll Hall of Fame’ nung par telok aniokba sülen parnok sapur karibo parnok ano tanaben lungjemshitsü akok ta imlaa liasü. Aji oda süaka Rose-i iba sentong nung madentsü telemtetba agi aser pai parnok kechiba matener’ar iba indang shidi nung rasaa zülur yoka liasü.
“Mejanga aliba azüji odang mejangdakjang.Tang ya tebilemba tanga atema apusotsü mapang lir. Kibonga bala lular nung koda,” ta Rose-i zülua liasü.
Pai, “Tarutsü mapangtem nung Izzy [Stradlin] medeni ken ka mesüra ana nung onok külemi shilem agitsü akok saka iba dakji alaka lungjemtsü tebilembabo mali,” ta ashi.
Ajisüaka Rolling Stone dang Slash-ibo, “Iba sentong nung adentsü asoshi ken tendangba mapang tangatettep tajung kati arütsü imlar,” ta shia liasü.
“Kü mulung nung teti bilembaji, khen mapang ka nungbosa onok telok züngsem ajak lungjemer külemi shilem tajung aginer, saka aji kü tebilemba kadang lir,” ta Slash-i ashi.