Himachal Pradesh anentsüh nung nisung 45 asü

Shimla, August 13 (Agencies): Himachal Pradesh kübok Mandi-Pathankot national highway nung Kotpuri anasa anentsüh ka ajanga sorkar bus gari ana anenbang aser iba lendong nung nisung 46 taküm samaogo ta Deobar nikongdang ketdangser kati ashi.
Tasürtemji nisung 50 dak tema asütsü akok kechiyong anentsüh jagi bus gari ana tashi anenbang, ta paisa ashi.
Tang tashi nung tasümang 46 ngutetogo aser mang 23 ano mejangjatet lir, ta Mandi deputy commissioner Sandeep Kadam-i osangbener dang ashi.
National Disaster Response Force (NDRF), army aser police temi ali ondokba kol aser garitem bener arua bus ana anenbanga aliba yadoktsü mapa inyak, saka anentsüh alutsü akok ta tsübua bilemba den aonung asüba agi mapa anen aser asüngnep nungia tenzüktsü, ta paisa metetdaktsü.
Chief Minister Virbhadra Singh-i lendong atalokba tesem semdang aser tatembangba mang mangu tashi rescue operation inyaktsü ta pai ashi.
Iba lendong nung yirua alirtem medical expenses ji state sorkari agütsütsü ta chief minister-isa metetdaktsü. Paisa tasür kinungertem den ajurutepa asükhu lemsatep.
Health Minister Kaul Singh Thakur, Transport Minister G S Bali aser Rural Development & Panchayati Raj Minister Anil Sharma nungertemia lendong atalokba tesem semdang.
Iba lendong nung tasür kibong shia nem sen lakh 4 teyari agütsütsü ta Thakur-i ashi aser külen Bali-ia tasür kibong shia nem state transport corporation ajanga sen lakh kaka teyari agütsütsü ta metetdaktsü.
Prime Minister Narendra Modi-ia Twitter nung mangyimba osang metetdaktsü.
“HP kübok Mandi district nung anentsüh ajanga nisung takümtem samaba atema temulung raksar. Tasür kibong ajak den asükhu lemsateper” ta Modi-i Twitter ajanga lemsatep.