Cellphone nung mesen tepsetba charger ka yangluogo

Washington, August 23 (Agencies): US nung cellphone charger ka nung ultraviolet light amshia mesen tepsettsü aser mobile phone merüktettsü yanglutetogo.
Iba universal charger ajanga cellphone nung aliba bacteria tepsettsü, ta Utah nung amenoka aliba company PhoneSoap ajanga metetdaktsü.
Parnoki yangluba PhoneSoap charger nung UV-C lamps ana lir aser iba jagi phone nung aliba bacteria aser virus indang DNA tepseter.
Iba charger telung nung phone enoka lia ring, notifications mesüra alarms aruba metettsü. Iba charger indang jenjangji US nunger sen 59.95 lir aser phone timbaka den puteptsü. Phone ka nung mesen ajak tepsettsü atema minute pezü shi agir aser iba mapa tembangba sülen charger tejaklen blue indicator ka ajanga sayutsü.
Taoba mapang bushisüngdanger balala ajanga metsümeshidak aliba menden dang nungi cellphone nung mesen timba lir ta bushitetogo.
Tawa tu University of Surrey-i bushitetba osang ka nung, cellphone nung aliba mesen timbaka dak lendong mali saka Staphylococcus aureus amala tashidak adokdaktsüba mesentema alir ta metetdaktsüogo.