S.A.K aser K.Y.O nati Assam Rifles aitsür

Dimapur, August 23 (Agencies) : August 18, 2015 anepdang 3:00 ako nungi 4:00 ako tsüngda Assam Rifles-i SAK züngsem tajung ana ki mita aoba mapa kukua aitsür ta Service Association Kiruphema (S.A.K.)-i tanü sangdong ka nung metetdaktsü.
Iba anepdang Assam Rifles telok kati taoba SAK tir Keviyanei Suohumvü P/ T, GPS, Kiruphe Basa’er ki mita reprang. Parnok nem osang sangoktsürtemi ashiba nung ajemdaker AR sepaitemi ki mita senzü, ta SAK sangdong nungsa shia lir.
Iba mapang Keviyanei-i sepaitem dang pa Primary school tesayur aser ano iba tesem nung B.L.O inyaker ta shiaka sepaitemi par ki anepdang 4:00 tashi mita reprang. Keviyanei’er ki mita reprangba nung taitsü aketba kecha mongutetba sülen AR sepaitemi ano SAK züngsemsa Rokosakho Suohumvü, Drawing Teacher, GMS, Kiruphema’er ki mita reprang saka idakjia kecha mangu, ta sangdong nungsa ashi.
‘Friends of the Hill People’ ta ajar Assam Rifles-i iba ama tai maketertem ki mita senzüba mapa ya SAK-i kukua aitsür aser talisa sepaitem anir aruba Officer-Incharge aitsür, ta SAK tir Rokovikho Hesielie-i sangdong nung shia lir.
Ano tanga sangdong ka nung Kiruphema Youth Organization (KYO)-ia iba tatalokba kukua aitsüogo.
Assam Rifles-i prangpong-injang bener arua Kiruphema nung züngsem tajung ki ana mita senzüba ajanga yimtsüng nung alirtem asoshi tetsübu tensa ka bener arutsüogo. Parnoki ki mita reprangba nisung anaprongji sorkar mapa inyakertem aser ozüng akümtsüburtem dang lir. Tiprong nung sepaitemi ki kakpoka atur mitba ajanga parnok kinüngtsü aser chinurtem kanga aoksadaktsü aser tebilemtsü bener arutsüogo, ta KYO sangdong nungsa shia lir.
Assam Rifles-i temulung melemi bilemba nung dang ajemdaker sorkar mapa inyakertem ki mita senzür süra, kodaser parnoki ket nungi civilian tem jenbua alitsü. Iba inyakyim ajanga Assam Rifles tajangzük kecha mangutsü saka parnok tenüng menükang tali bener arutsü. Anungji tarutsü nung ibala mesükba mapa meinyaktsü metetdaktsür, ta KYO tir Viketuokho Yavio aser tongti tezülur Thegosevi Shoshahie nati sangdong nung metetdaktsü.
India sorkar aser NSCN(IM) tsüngda tawa yimjung tenangzüktep agiba aser Naga yimten telok kar den ceasefire agia aliba nung ajemdaker Assam Rifles-i Kiruphema yimtsüng nung tensa raksatsü atema mapa meinyaktsüla, ta KYO lennirtemisa shia lir.