Global Entrepreneurship Summit nung nisung 1500-i shilem agitsü

New Delhi, August 17 (Agencies): Taküm November 28-30, 2017 anogotem nung Hyderabad yimti nung ayongba Global Entrepreneurship Summit (GES) nung linük 160 nungi tejaoker nisung 1500-i shilem agitsü; iba senden nung United States Tir, Donald Trump’er jala, Ivanka Trump leniba nung US nungi teshimtet telok ka adentsü, ta Brihostibarnü osang ka ajanga metetdaktsü.
Iba senden nung India nunger entrepreneurs 400, US nungi 400 aser tanüngba linüktem nungi entrepreneurs 400 den investors 300 adentsü.
“Entrepreneurs aser investors shimba maparen tang teinyakdak lir,” ta tanü ketdangser kati metetdaktsü.
2010 küm mezüng White House nung taoba US Tir, Barack Obama leniba nung Global Entrepreneurship Summit senden mena liasü, aser iba sülen Kenya, Morocco, Turkey, United Arab Emirates aser Malaysia linüktem nunga iba senden ayonga kaogo.
Yaküm iba senden ya US, Silicon Valley nung amen aser iba mapang nung linük 160 nungi nisung 1,500 shi dena liasü.
Yaküm June ita nung Ato kilonser, Narendra Modi-i Washington semdangba mapang Obama tenati, 2017 GES ji India nung ayonga akatsü, ta sangdonga liasü.
“Hyderabad ya technology tiyongtsü ka asüba aser infrastructure junga aliba agi iba senden amentsü atema iba yimti shim,” ta US ketdangser kati ashi.
Senden mezüngbuba anogo nung US Tir, Donald Trump’er jala, Ivanka-ia jembitsü.