Arunachal-i aou ayoktsü atema MoU agitep

Itanagar, August 23 (Agencies) : Arunachal Pradesh aou lu ayimertem yaritsü atema Numaligarh Refinery Limited (NRL) aser Hindustan Paper Corporation na den Memorandum of Understandings (MoUs) agitsü.
“State sorkari NRL den tenangzüktep ka agitsü aser ibaji state nungi aou tonne lakh asem ayoktsü atema asütsü,” ta Arunachal Pradesh Bamboo Resource Development Agency (APBRDA) Vice-chairman Yora Tagung-i ashi.
“Iba MoU ajanga Arunachal nung aou lu ayimertem aser zünger mapa mangu aliba lanurtem teyari angutsü. Ano state sorkari Hindustan Paper Corporation dena aou tonne lakh 1 ayoktsü atema MoU agiteptsü” ta paisa ashi.
Iba ya tetenzüker dang. Ano onoki aou tsünürtem ajangzükdaktsütsü atema company balala den MoU agitsü asoshi inyaktsü. Iba ya ajanga state nung zünger mapa mongui aliba lanurtem yaritsü aser state indang senpong nung sen bendentsü, ta Yora Tagung-isa shisem.
Junga ketdangsüra aou sector ya state atema sen arulen ka asütsü aser ibaji atema APBRDA-i state kübok district shia nung small scale bamboo industry tem lapoktsü aser item nung toothpicks, incense sticks aser item nüngdakba osettem yanglutsü, ta Yora-isa ashi.