Sushma ama masü kü adianu-ibo tim inyakogo: Mizo CM

Kolkata (West Bengal), August 23 (Agencies): Honibar nü Kolkata nung Mizoram Chief Minister, Lal Thanhawla-i pa adianu aser taoba state Health, Information & Communication minister Lal Thanzara-i pa anema tai tongloktsüba nung ajemdaker pasasa minister menden nungi aluba atema tenüngsanga jembiogo.
Kolkata nung Calcutta Auxiliary of the Bible Society of India-i ayongzüka taoba mapang missionary aser lokti nung temelenshi asoshi inyaker, Reverend William Carey asoba 254buba nüngtem nung sentong ka tembangba sülen osangbenertem den jembidang Congress lenir tain aser Mizoram Chief minister Thanhawla-i, “Rajasthan chief minister Vasundhara Raje, Madhya Pradesh chief minister Shivraj Singh Chauhan aser External affairs minister Sushma Swaraj nunger anema ochimashiba ken o nung tai tonglokja aliyonga parnoki menden nungi malu,” ta ashi.
Mizoram public works department (PWD) project agizüka inyakba Construction firm- Sunshine Overseas Company nung Thanzara-a tajangzük angutsü shilem lir, ta opposition party temi tai tongloktsüba sülen tawa Lal Thanzara-i minister menden toktsüba den külemi Aizawl North III assembly menden tokja liasü.
Iba dak sentakba nung Mizoram Chief minister-i, “Pa kü adianu süaka, ni pa tenüng asanger. Taitsüba liaka BJP lenirtemibo pei menden nungi matsüngshi. Bushisüngdangertemi sadema bushisüngdangtettsü asoshi yazü nung tai tonglokja liaka Thanzara-i menden toktsüogo,” ta paisa shisem.