NPF Dimapur Division-i NPF tir Neiphiu Rio pusemer

Dimapur, August 20 (TYO): NPF Dimapur Division nung Division ketdangpurtemi anir Women Wing, Youth Wing, Minority Wing, Farmers’ Wing aser A/C party unit 5-i NPF tir Neiphiu Rio pusema nungittsü telemtetba agia sangdongogo.
NPF Central nungi Women Wing aser Minority Wing pur dena NPF Dimapur Division nungi teshimtet teloki Neiphiu Rio den ajurutep aser pa NPF party len anitsü shimba atema pelaba metetdaktsü.
Iba mapang Rio-i tang NPF party nung mepetmesü adoka aliba indang osang tejangja metetdaktsü.
Pai ashiba agi, 2014 küm pa Lok Sabha MP inyaktsü atema Delhi-i ao aser iba mapang nungi party sasep nung mangatettep adok aser tanü tashi iba khuretji lir.
NPF nung telok tilabai benokba ken o tem Kohima Bench nungi tenzüker Supreme Court tashi nung magizüker. Telok tilabai parnok den madener ajak anema mapa inyak aser iba nung Angh nungi Supreme Court tashi dena liasü. Taoba NPF tir Dr. Shurhozelie-i pai bilemba dang inyak, tashiyim amshi aser temzüng alema inyak. Iba ama lennisüba ajanga party aser state raksatsüogo, ta Rio-isa shisem.
Paisa, Naga nunger atema tarutsü mangdang indang ashidang, ‘kechisarena ajak nung terenlok aser lanurtemi tashi idaktsüba loktiliba ka kümdaktsütsü alizüng lir’ ta ashi.
“Asenok Naga nunger asüba atema nüma atangtsüla aser asenok longjem nungdang alizüng tongtettsü. Asenok longjem nungdang anogo tajungtem arutsü” ta Rio-isa ashi.
Iba sentong NPF Dimapur Division working president H. Thong, NPF Central Women Wing tenüng nungi Secretary Tokheli Kikon, NPF Dimapur Division Vice President S. Hukavi Murru-i Dimapur III A/C tenüng nung, NPF Dimapur Division Youth Wing president Phyobemo Odyuo, Minority Wing Working President Mahendra Thaosen, NPF Central, Y. Mhonimo Ngullie, NPF Dimapur Division Farmers’ Wing President aser Dimapur District kübok assembly constituency 5 nungi party lennirtemia o jembi.
Parnok ajaki NPF tir Neiphiu Rio pusema nungitba aser taruba General Elections nung NPF party takok ngudaktsütsü atema o jembi. Sentong nung mendenji Nchumo Kikon liasü.