MCCI-i nüburtem dang tekümdangtsü osang ka sangdonger

Mokokchung, August 23 (TYO): Mokokchung district nung melung malemba nisung kari taila electronic osettem densema tanga osettem ayokba jangjaogo; ibayongji Mokokchung Chamber of Commerce & Industry (MCCI)-i nüburtem dang tekümdangtsü osang ya sangdonger, ta tanü MCCI-i sangdong ka ajanga metetdaktsü.
“Tawa-tanü customer tem ashiokja taila, branded LED television, solar lamps aser domestic LPG gas stoves alitepba osang kanga bulur. Yamaji yimtsüng nung customer anati taila ser nung branded südi ta bilemer Samsung LED television sets aliba sülen parnoki tayokertemji dena MCCI dangi anir aru,” ta MCCI-isa metetdaktsü.
“Customer anati tai tongloktsübaji shidak, ta tayokertem jagi nangzükogo. Electronic shishir kari item osetji reprangdangba sülen ‘branded’ television ji atangji taila liasü ta metet. Iba mangatettepji parnok tsüngda benteta tayokertem jagi sen meyipa agütsüogo,” ta MCCI-isa metetdaktsü.
“Ashiokja osettsüset ayokertemi inyakba yimyaji- parnoki kibok shia dangi tua parnok sepaitem lir aser kidangi sodi aotsü atema military CSD canteen osettem shidakba jenjang nungi tesadang agi kanga langa ayoker ta ashir. Parnoki ki para bushia item osettemji rizünga yur shishilembar. Parnok ya telok tulu ka tenteter taila osettem ayoker südi ta onoki melung maleer. Parnoki warranty receipts magütsür saka customer tem mesüzükteta item oset yokdoker,” ta MCCI-isa nüburtem dang tekümdangtsü metetdaktsü.
“Anungji customers aser nüburtemi item ama taila shishirtem nem mashiokdaktsütsü kümdangtsü mepishir, iba den külemi tang nungibo MCCI-i item ama keno mangadangtsü. Anungji nüburtemi chichiba registered sellers dang nungi dang item ama osettem alitsü ajungshir,” ta MCCI-isa metetdaktsüogo.