Rahul-i tezüluba mebeni minute 2-a mejembiteter: Smriti Irani

New Delhi, August 23 (Agencies): Congress tatong Tir Rahul Gandhi-i NDA sorkar aija ‘suit asemba sorkar’ ta jembiba dak sentakba nung tanü Union Human Resources Development Minister, Smriti Irani-i, Rahul Gandhi-i Parliament nung tezüluba mebeni minute ana-a mejembiteter, ta aitsüogo.
Parliament nung minute ana jembitsü asoshi-a pai (Rahul) tezüluba bener arur, ta lai ashi.
Rahul’er constituency, Amethi nung lokti senden ka nung jembidang lai, “Nüburtemi Amethi tashi railway lenmang imlaa liasü, Gandhi’er kibongi puto asem tashi yimsüsüba mapang ibaji mataloktsü. February 24, 2015 nü Rajiv Gandhi charitable trust-i aluyimer li acre 65 alizük. Shiba mapa angu,” ta ashi.
Tang Irani-i Amethi semdanga lir aser lai yangji tetsür 25,000 nem insurance sen lemtsütsü.
2014 Lok Sabha election, Amethi parliamentary constituency nung Irani-i Congress tatong Tir Rahul Gandhi anema toktepa liasü, saka lai tamakok angu.
April ita Parliament senden ka nung Rahul Gandhi-i, “Ner sorkari aluyimertemi mepishiba mangar. Iba sorkar ya industrialist tem atema sorkar lir. Nenok sorkar ya ‘suit asemba sorkar” lir,” ta Modi-i aniba NDA sorkar aija liasü.