Swaraj-i Egypt aser Germany na semdangtsü apusoa ogo

New Delhi, August 23 (Agencies): External affairs minister, Sushma Swaraj-i Egypt aser Germany linük na semdangtsü asoshi tanü New Delhi nungi apusoa ogo, aser lai bendang linük anaji semdangba mapang linük tsüngda tesentaktep tajungba yanglutsü aser shishilembabaren onük jembitsü imlar.
Sushma-i Egypt linük tama anogo ananü semdangtsü.
Lai Egypt yimtiba, Cairo semdangba mapang Egypt Tir, Abdel Fattah Al Sisi ajurutsü aser Egypt External affairs minister Sameh Hassan Shoukry den-a senden amentsü, iba dak alia lai League of Arab States, secretary general, Nabil ElAraby densema lenir aika ajurutsü.
Swaraj-i tang mezüng external affairs minister ka ama iba linük semdanger aser lai Cairo nung aliba Diplomatic Club nung Egyptian Council for Foreign Affairs-i ayongzükba sentong nung jembitsü.
“Minister-i Cairo semdangba ajanga asen linük tesentaktep reprangshitsü asoshi maongka angutsü aser linük anaprong indang onüktem benoka Egypt lenirtem den jembitettsü,” ta External Affairs Ministry sangdong ka ajanga ashi.
India atema Africa continent nung Egypt linük ya shishilembabaren nung kanga tongtibang partner ka lir.
Taoba financial küm (April 2014 — March 2015) nung India aser Egypt na tsüngda US sen billion 4.76 shishilembaogo.
Egypt atema shishilembaba partner jenjang trokbuba nung India lir.
India-i 2014-15 küm Egypt dang nungi US sen billion 1.74 jenjang shishilembaogo.
Sushma-isa August 25-27 anogotem nung Berlin (Germany) semdangtsü aser lai Germany Foreign Minister, Frank Walter Steinmeier densema lenirtem aika ajurua senden amentsü, ta ministry osang ajangasa ashi.
Linük anapronglai tesentaktep ken o jembitsü aser rongsenkettsüng onük nung rangloker jembitsü imlar.