Ochimashi ken o nung Lee Jae-yong aitsüogo

Seoul, August 25 (Agencies): South Korea nung aliba court ka ajanga Samsung yimli agizüktsü alisang, Lee Jae-yong ya ochimashi ken o nung aija tepuokdak küm pongu ayutsü obendang agütsüogo.
Taoba South Korea tir menden nungi alutsüsa kümdaktsüba ken o nung Lee ya aija liasü.
Lee-i aibelen kicha meinyak, ta shiaka pa ya küm 12 tashi tepuokdak ayutsü akok.
Pa dang ya Jay Y Lee, ta ajar aser alima nung smartphone yangluba company tulutiba nung pa tekolakba lir aser pa ya ochimashi ken o nung ajemdaker February ita nungi tepuokdak yua liasü.
Lee anema benokba ken o nung pa tajangzük angutsü mechi sen amshiba, tangar indang rongsen nung kibur akümba aser tanga linük nung rongsen miima ayuba amala lir.
South Korea nung taoba tir, Park Geun-hye indang medemer Choi Coon-sil indang non-profit foundation ka nem yimden yimsüsüba nungi tajangzük angutsü mechi Lee-i sen million $36 tenla agütsü.
Samsung company tuluba küma Samsung Electronics nung Lee tashi taitba kümdaktsütsü asoshi sorkar nungi teyari ngutettsü mechi Park medemtsür nem iba tenla ya agütsü, ta prosecutor temi ashi.
Saka Lee medena jembitsür temi ashiba agi, iba senotsü agütsüba ya pai memeteti zülutep.
Lee’er indang firm ajanga Choi’er jala, Chung Yoo-ra nem kor aser sen agütsü saka teyari kicha memeshi, ta Lee-i tamalen nangzüka liasü.
Tang court ajanga obendang agütsüba anema anu temepishiba agütsütsü, ta Lee indang lawyer, Song Wu-cheol-i Hokulbarnü ashi.
Iba kasa ken o ajanga tir Park ya menden nungi atsüngdok aser la indang ken o jembiba mapang ka lir, saka lai ochimashi mapa meinyak, ta nokdaker.
Choi-i lar jala asoshi jenjang aisü nung maongka angutsü mechi la aser Park tsüngta tesendaktep aliba jenjang ya amshi, ta aija Choi ya küm asem asoshi tepuokdak yua lir.
Hokulbarnü kasa ken o indang obendang agütsüba nung Samsung executive, Choi Gee-sung aser Chang Choong-ki na aija küm pezü tepuokdak ayutsü totuyuba agütsüogo. Taoba mapang Samsung Electronics tir, Park Sang-jin aser executive vice-peresident, Hwang Sung-soo na tepuokdak ayutsü asoshi totuyuba agütsüba khen asoshi soita lir.
South Korea nung company tulu indang ketdangsertem ochimashi ken o nung aitsüba ya Lee mezüng masü. Taoba mapang nunga iba ama ken o nung aija alirtem indang obendang ya agientsü mesüra linük tir-i taochi sayua tepuokdak mayu.
Aji süaka tang South Korea nung tir tasenba, Moon Jae-in-i tir indang taochi sayutsü mali, ta shia lir.
Iba obendang agütsüba ajanga South Korea nung tulutiba aser alima ajungai meteta aliba company aser shishilempaba nung kongshitsü. Iba obendang agütsüba sülen Samsung indang share shilem ka agi tajemba kümogo.
Aser iba ajanga kibong ka indang Samsung company nung ketdangser shimtsü asoshi tasüngdangba arur. 2014 küm Lee tebu Lee Kun-hee temolungjang agi mapa junga meinyaki akümba ajanga iba company nung mendenpuba mapa ya Lee-i inyaka arua liasü.
Lee indang adianu tetsür ana lir, aser tena ya Samsung telok balala nung ketdangser mapa inyaka arur saka tena temaba jenjangi ajungkettsü asoshi osang kicha arua mali.