Ao Senden dangi züluba shidi pusemer

 ~T. Atu Jamir, Mokokchung

August 24, 2017, Ao Milen Page 2, aser Tir Yimyim page 11 nung asen Aor tasü tait nübu asemi Ao Senden dangi züluba shiti ngua kanga süngmangseta liogo, saka kecha mesüngmangli asen Naga nunger okatsürtem sen agi mesepogo, parnoki asenok temeten asoshi parnok sasa keno benoktsübo pongmang sür nübur kari keno benokra aji nokdangtsü aser tzümar nem asen temetenji sür odaktsütsü asoshi sen dang metet ashi joko alima aser kin kecha memetet kümogo.
Par asemi shiti nung shia aliba ama police department nung nia mapa tilaka danga ngunüa küm aika bushidangaka tanü tashi kecha menguteti lir, saka küm asem tsüngda tsümarbo 239 tashi Govt. mapa 100% Naga lisopur nem wazüka yutsüba nung mapai itetba kuli tejangja ngua kanga süngmanger, aser iba keno nung nia kü tashi yari tatem tashi nongittsü nangzüker. Iba amala keno ya okadak senotsü, nübu aser mapang lalua jembishia mekazüyonga kin telungjem aser kaketshirtemi manger sangwa nung ankilang tema züka meintoktsüba maparen, saka lokti mapaji onsara asünungji mayimjemba/ mengujemba agi ola madoki liasü südi ta bilemer, mesüra Govt-ia pei sasa merüktettsüba maparen lir. Iba keno ya Nagaland Govt, lokti tentet aser kaketshir telungjemtemi Naga nunger ajungtsü bilema ali asü maliar kuli tejangja jungkai adokba Tsüngremer sentong ka lir ta nibo bilemer. Ashiko ano iba mesükba Department ajak nung alitsüa akok, itemjia memenui kakteta aotsü imla atar, Naga nüburtem nenok den lir maneni tasü ita inyaktsü ajungmesor.
Advocate ana Wati Jamir aser Imkong Jamir tena ya Senior Advocate C. T Jamir chamber nungi ta angazüker. C. T Jamir ya Nagaland Tribes Action Committee, koba teloki Naga nunger temeten asoshi nokdakba yong taküm ULB election magitet, aser iba asoshi azü agi tenlaa taküm lalua nokdak, iba telok nung tongti zülur ta angazüker, ni bilembo tamasa pa dang yimtsüyimpu kari oa tashitsü tim o ashitsüla. Kechiyong pa Naga nunger temeten wazüka yunüba telok nung tongti zülur aser par junior-tembo ibaji anemer ta asünung meputeper.
Ya asen Aor samanir kin, tangar kin tsüngdang taktsü mapa aser rongsen nung asonga asütsü metsübuba kuli sayur, anungji kecha keno metenzükdang tamasa pai par junior-tem iba amala asen kin temeten ajemrepa aliba raraba tongpang nung tzümar tepu makümtsü tetuyuba agütsütsü junger, pai ashibaji mangara tena asoshisa takoksa asütsü südi ta bilemtsür. ULB election nung tashi mangartem küm 30 intokogo, saka tang yabo iba jakibo temulung asütsüla maparen masüa ta nibo reprangteter.
Nisung tepseter kati sen dang karbo India nung lawyer tajungtiba ka taa talang tashi agütsüa anir arur pa/la asoshi nokdakdaktsütsü temeten lir, ajisüaka tang amala kin temeten raktepba keno nungbo nüchi puribo pei sasa angateta shilem magir. Saka tang ya tangar masü Naga nunger temeten keno nung Naga nungeri anema nokdaktsüji shingaia mashiyonga Naga nungeribo tzümartemji tepu makümtsüla ta nibo bilemer. Asenok ajak sentepera tangar memeneper, reprangang asen temeten 100% wazüka yutsüba nung tzümar nepoka aita chuba kümer lir, süra yangi asenok lemsar rara nung koba jenjangi aitsü?
Hoi… Naga nunger okatsürtem, nenoki Nagalima meimba agi okatsünür asü Nagalima yoka achitsüba asoshi okatsünür? Nenok sasa ochimashiba keno kwika okadak benoka ali? Aser nenoki ochimashiba keno kwika pusema nongita ali? Tang Department aika nung ochimashiba keno kakteta okadak keno benoka odaki, item ajakji sen talang tashi agir kümzüktsü nenok tepu metsükshia atar, ya tajung masü, shitakba agi Christian ka aser timtemer sensaker nenoki meim asübo, yimdaklir, shiranger, timtemer asoshi aruba sen ochimashi amshiba keno mesüra Naga nunger lanur Govt. mapai aitsü mangur, saka Naga lisopur asoshi 100% wazüka yutsüba tzümar dang yoka achiba ashikülak mapa item amala anema nenok sasa keno benoktsü melen tangari timtema senotsü apumesar keno benokba nung nenok sen aatsü dang ata alir. Iba amala keno nungbo sen ki sünga tokdentsüdi asüyonga “Yamala ochimashi keno nung nibo pusema mejembitettsü” ta ashitsü melen “Yakta arung aser jenjang tajung alangtetdi” ta dang repranga lir südi to?.