Arunachal nungi Agriculture team kati Nagaland semdang

Kohima, August 26 (TYO): August 24, 2017 nü Arunachal Pradesh nungi Agriculture team kati Nagaland semdangogo, ta tanü ketdangsertem osang ka ajanga metetdaktsü.
Arunachal Pradesh state Agriculture, Fisheries, Trade & Commerce Minister, Wangki Lanwang, Trade & Commerce Parliamentary Secretary, Tesam Pongte, Director of Fisheries, Josil Taba aser Tirap, Chauglang aser Longding nungi department ketdangsertemi state semdanga liasü.
Parnoki Dzuleke, Khonoma, Jotsoma aser Jakhama nung project tesemtem semdangba mapang nung Additional Director of Fisheries, Imtitongzuk Longkumer, Joint Director, Agricultural Jacob Yanthan aser tanga ketdangsertemi parnok meina liasü.
Nagaland semdangba ya mapang tajung ka lir, ta shia Agriculture, Fisheries, Trade & Commerce Minister, Wangki Lanwang-i, yim tilaka dang süaka Dzeleke nung alirtemi alima apayua akhüm tsübua benshiba ya India aser Nagaland atema dang masü saka alima rangben atema tangazüktsü ka lir, ta ashi.
Arunachal Pradesh nung benshiba inyakyim atishia Minister-i yimtsüng nung rongsenkettsüng terenlok alitsü atema tourism industry aser fisheries na sendakteptsüla, ta ashi.
Tesülen Tourist lodge, Dzeleke nung shisa lemsatepba sentong ka agidang Minister-i yimtsüng nung alirtemi alima tzü mopung aser arem wazüka ayuba atema pelaba metetdaktsü, iba den külemi yimer nem sen 50,000 tenla agütsü.
Kasa sentong nungsa Dzeleke Village Council Chairman, Avi-ia aienertemi yim semdangba aser yariba atema pelaba lemsatep.
Council Chairman-isa, alima wazüka ayutsü atema yimertemi ozüng takang aika lateta lir, ta metetdakja liasü.
Arunachal nungi semdangertemi Khonoma yim nunga unique alder cultivation semdangtsü sentong liasü, ajisüaka tzünglu maneni aruba agi thinen, ajisüaka parnoki iba yimdak aonsotsü aser oset balala sayababo repranga liasü.
Tesülen parnoki G.H.Damant M.A.C.S memorial semdang. Damant ya Khonoma aser Khonoma fort tongbang nung raradang asü.
Additional Director of Fisheries, C. Imtitongzuk-i, Dzuleke nungertemji tesüngjem aser ochishia mapa meranga inyakertem lir, ta ashi.
Jakhama semdangba mapang nung pai, Jakhama nung tzülu aser Fisheries inyakyimji, tamalen taoba Director of Fisheries-i Japan semdangba sülen iba cultivation inyakyim tenzükdangyongi yimdaka tenzük, ta metetdaktsü.