Rima Sharma’er kinunger nem sen teyari lakh 2 agütsütsü:CM

Guwahati, August 28 (Agencies): Assam Chief Minister Sarbananda Sonowal-i Assam nung osang bener Rima Sharma’er kinunger nem sen lakh ana teyari agütsütsüba nangzükogo. Rima ya Honibar aonung Guwahati kübok Bhangagarh tesem nung gari lendong ka nung tsükseta asü.
Asü khu lemsatepba den külemi, Sonowal-i asür Rima Sharma’er kinunger tem nem teyari sen lakh ana agütsütsüba nangzüka liasü.
La ajungbena asüba ajanga Assam nung osangbenertem ajak aoksadaktsüogo. Asür Rima Sharma ya Assam nung local news channel tejentiba rongnung ka, Prag New nung cultural news presenter ka liasü. La Guwahati nung Honibar aonung tata gari kati tsükset.
Rima ya GMCH nung Biman Kalita indang osang agir aruba mapang nung tia maka iba lendong ajuru. Biman yaa News Live nungi osangbener ka lir, shiba tanga tatalokba ka nung gotari agi yirutsüba sülen GMCH nung monga liasü.
Police temi ashiba agi, la ABC, G.S Road nung TVS showroom anasa ayaterm 12:30 shi nung tata gari kati atsük. Iba tata gari ya Ganeshguri nungi Bhangagarh-i oya liasü.
Police temi iba tesem nung CCTV camera ajanga tengutetba dak ajemdaker tata gari ya puogo aser iba gari ania liasü ta temolung melemi bilemba nisungba dena pua lir.