Indo-Pak DGMO senden alitsü: Sartaj Aziz

Islamabad, August 23 (Agencies): Pakistan-i Indo-Pak NSA senden thinentsüba sülen anogo ka lir tanü Pakistan-i, Ufa (Russia) nung bangjemtepba ama linük anaprong nungi DGMOs aser Pakistan Rangers den BSF ketdangsertem senden amentsü, ta ashi.
Pakistan, National Security Advisor, Sartaj Aziz-i, “Au, Rangers aser BSF senden amentsü. DGMOs senden-a amentsü,” ta ashi.
“Pakistan Rangers-BSF senden ji 6 nü (Sept. 6) amentsü lemteter ama ni bilemer. Directors General of Military Operations (DGMOs) tem tesem mashi ka nung ajuruteptettsü, kong ajuruteptsü’ar parnok tsüngda ibaji lemtettsü akok,” ta TV channel ka den jembiba mapang Aziz-i ashi.
NSA senden thinenba taiji India tsütsülen nungia lir ta shia Aziz-i, New Delhi-i kiralongraba onük dang jembitsü ta noktakbaji “külen tsütsü nungi dang lemtetba lir” ta ashi.
Aziz-i ashiba agi, Ufa nung Pakistan Ato kilonser Nawaz Sharif aser India Ato kilonser Narendra Modi na tsüngda lemtetbaji linük anapronglai balala rateta agiogo.
“Onoki Kashmir indanga süoka jembiner. Kashmir onük jembiba ajanga taliba sadoka akümtsü. Anungji onoki kiralongraba onük masü saka Kashmir onük jembiner. Tesüiba mapang nung tanga onüktem den kiralongraba onük-a jembitetogo. (Süra) Tangbo, tanga onük masü saka kiralongraba onük dang jembitsü ta külen tsütsü (India) nungi dang telemtetba agir,” ta paisa shisem.