Tanü Nagaland ajungalen “Mega mock exercise” agitsü

Kohima, August 29 (TYO): Nagaland State Disaster Management Authority (NSDMA)-i August 30 nü state ajunga nung Nagaland Emergency Preparedness Exercise (NEPEx) agitsü.
Kohima nung iba sentong atema tongtipang tesem 16 shimteta lir aser anepdang 11:00 ako nungi tenzüka ghonda 2-3 ka agitsü.
“Iba ya district ajak nung agiba exercise ka lir. Ajungben lendong-tsüdong atalokdang asenok renema alitsü aser jenbutsü atema iba exercise ajanga asenok nem tesayubatem agütsütsü” ta Additional chief secretary & home commissioner Temjen Toy-i osangbenertem dang ashi.
Nagaland ya Seismic Zone V kübok lir aser August 30 nü disaster exercise ji menoknok dak tuluba rangloker agitsü, ta paisa shisem.
Iba exercise ya Richter scale nung 8.4 tashi asadangba menoknok nung ajemdaker agitsü. Iba ama exercise ka agiba ajanga asenoki asen tashi aitba aser tashi maitba meteter, ta Temjen Toy-isa ashi.
NEPEx tembangba sülen onoki district ajak nungi osangtsüsang agiteptsü aser idangji kechi tai mesüra shitak itemji jangjatsü. Iba ya exercise ka dang lir saka iba ajanga nisung ajak chichiba lendong atalokdang teyari angutsü, ta paisa metetdaktsü.
NSDMA-ia public dang iba mock exercise atema maoksatsü saka ketdangsertem den amalitepa yariteptsü mepishia metetdaktsüogo.
“Iba ama drills/exercise ya kanga dang tajung lir kechiyong iba ajanga asenoki angazüker aser shitakba lendong atalokdang, asenoki tim teinyaktsütem inyaker” ta NSDMA-isa ashi.
NEPEx ya NSDMA indang state wide emergency exercise lir.