T. Atu Jamir-i züluba meyiptsür

– C. T. Jamir
Senior Advocate, Gauhati High Court, Kohima Bench, Kohima.

T. Atu Jamir-i Tir Yimyim adok 27th August olemsabang column nung Ao Senden dangi züluba shidi pusemer ta sür züluba züngogo. Khen bilembo T. Atu Jamir tangatetba apidanger mapang indoka langzütsü kecha nüngdak mali ta bilemer. Saka paper azüngertemi koba tim mapa lir, ibaji tejangja rajema angatettsü mechi nung telangzüba kar tongmelang agi meyiptsür.
1. Nai züluba ajungaji reprangra Okatsürtem mapa aser inyakyim jangja-a nai memetet, saka nisung kari jembia angashiba aser nü tangatetba shia lir. Tebilem nung Okatsür mapa aser inyakyim nai junga memetet aser mejangjaba agi züluogo ta angateta tejangjaba nung angatettsü asoshi yamai shiner.
a) Okatsür mapa dang ya tatsü agi temesüng O-i “Legal Profession” ta ajar aser iba inyakyim ya tanga mapatem dang nungi khenyongi balaka lir. Iba yongji nübortem ajakibo iba inyakyim ya junga meteta malitsüa akok. Ano iba mapa ya angati dang inyakdaktsüba aser Social Service dang inyakba mapa ka-a masü. Okatsür shiba südir süaka kodang ken-o kar bener arudir ken-oji angadanger ozüng nung kechi koma lir itemji apidanger agizüker. Saka tapi agi dangbo magizüker. Ozüng tsüngdang tulur-tilar, takar-sensaker ta mali; Aoer, tsümar ta-a kecha mali; saka ozüngji ajak dang nungi tematiba. Anungji iba dangji “rule of law” ta ajar.
b) Ken-oji obendangdak-i abener asünung obendanger-i (Judge) ken-o nung tena alir ajak angadanger ozüng-i melaba ama obendang agütsür. Okatsürtemi ozüng nung kechi shia lir itemji obendangdak (Court) jembir. Anungji obendangbo Okatsür temi masü saka obendanger (Court) ajanga-ang agütsür. Kari iba obendang magizüktetra temaba Court-i aotsü akok.
c) Ken-o Okatsür dangi bener arudang Okatsür ta-a (fee) kechi lir, ibaji ken-o bener arur dangji ashir aser molungtepra Okatsürtemi agizüka jembitsür. Nüngdakra khenkhenbo ta-a (fee) magi-i (pro bono) jembidaktsütsü-a akok. Okatsür fee ajak asoshi ozüngi latetja mali nung ken-o dak alang fee agir aser ibaji Okatsür dak pa/la jenjang (status) alang agir. Ken-o agizüker külen ozüngi kechi mela lir, item dak ajemdaker ochi nung nendak-nendaka inyaker. Taa agibaji pai inyakba mapa alang agir aser iba nungji kecha tai mali.
d) Okatsürtem asoshi ozüng ka lir aser iba dangji “Professional Ethics” ta temesüng O agi ajar aser iba temzüng-i melaba ama Okatsür tem-i alir aser inyaker. Ozüngi memelaba inyakra, pi tai yari temerenshi angutsü. Ni küm 27 tashi Okatsür mapa inyaka arudang iba ozüng-i melaba amadang inyaka aruogo aser inyaka aotsü. Kechiaser ochi aser shitak inyakba nung jangratem aser tepela lir. Ni küm 27 tashi Okatsür inyaka arudang koma inyaka aru aser inyakdar, külem Okatsürtem, obendangertem aser nübortem-i ngua aser meteta lir, aser item dak alaka asen mapa ajak Tsüngrem-i ngua aser meteta lir. Iba ama inyakba nungji Khristan yimsü nung aibelena inyakbabo malitsü südi ta bilemer.
e) T. Atu Jamir-i züluba nung Okatsürtembo sen atema dang inyaker amai zülua lir. Atangji ken-o okadak benoka jembitsüji okar mapa asünung ta-a (fee) agia inyaker. Ken-o abener yimya aser jenjang reprangdanger khen-khenbo angati-a ken-o agidaktsütsü-a akok (Pro bono). Saka Okatsür mapajibo ajak angati-dang inyaktsü amai angatetbaji tai. Na, T. Atu Jamir, Police Department nung küm aika mapa tila ka danga inyaknü-a bushi süra, kechi komala mapa ka aser koma bushi, nai dang metet. Saka Ni bilemer, na mapa bushibaji Social Service, ta-a magi-i angati Police Department nem free service agütsütsüba masü, saka ita sen agia ne tepok atema bushi südi ta bilemer. Saka Okatsürtemibo pa sen aatsü atema inyakba dang masü, saka sen magi-a aiben angati-a okadak ken-o jembitsür aser free legal advice-a agütsür.
Külen reprangra, S.T. Yapang shibai Naga nunger asoshi wazükja aliba temeten bushi-a High Court nung ken-o agüja lir, pai mapa tajung inyaktsü temolungtetba ngua pela-a bilemer aser pa tenüng asanger. Nübortem ajak ajangzüktsü asoshi mapa tajung inyaktsüji kanga tajung saka ibala mapatem inyakba nung khuret-a aika sentaka lir. Ibayongji mapa tajung inyaktsü bilemaka khuret aika aliba agi aikatibo meinyaktettsü akok. Shibai mapa tajung inyakdir, tangatetba tajung aser molungsentsü temerük agi inyak junger. Kechiaser asen-i inyakba ajaka tajung süaka, tamajung süaka, kenübo jungkai adoktsü. Tangar teyari yimla-a mapa tajung inyaka sayutsüji kü tangatetba nungbo jangratemtsü kabo masü.
Tang koba ken-o S.T. Yapang ajanga High Court nung agüja lir, iba mapa asoshi Legal Services Authority, Nagaland nungi sen Rs. 50,000/- (Rupees Fifty Thousand) only S.T. Yapang atema Okatsür nem agütsüba angashia aser meteta lir. Iba den Whats App balala nung iba ken-o asoshi sen meshia (Donations) lemsatepba aser iba sen S.T. Yapang Account nung inokjang ta zülutepba aser sen agütsüba-a angutsü. Pai PIL file asüba aser iba nüngtem nung tangar dang yimla-a senotsü meshia inyakba nungji tangatettsü aika lir. Ashiko item mapatemji T. Atu Jamir-ia meteta alitsü-a akok.
f) Ao Senden Office ajanga angazükba agi Aoer tasü tait nübu asem-i Ao Senden dangi züluba shiti Ao Senden ketdangpurtem-i benoka jembir ibala ama ken-o tang okadak benoka lia Ao Senden-i tangbo telemtetba magi tajungba ta lemtetba jangjaogo. Iba amala tezüluba osang kakettem nung adok nung Ao Senden-i kechi telemtetba agidir ibaji-a osang kaket nungji-sa adoktsünungang nübortemi tejangjaba rajemtsü.
g) Okadak (Court) ken-o benoka aliba mapang osang kaket balala ajanga iba okaba indang lemsatepbaji (Media Trial) tim masü ta linük ozüng-i shia lir. Ibayongji kechi tim aser metim, ibaji okadak ken-o benoka lia lemtanga jembiba aser tanga lemang ajanga ketsa ken-o lemtettsü bushibaji linük ozüng anema lir.
2. Advocate ana Wati Jamir aser Imkong Jamir kü chamber nung inyaker ta ashibaji-a shitak lir. Saka tenati koba ken-o agizüka jembitsü aser mejembitsü, ibaji tena molung ashi kü molung masü. Tenaprongla küm aika Okatsür mapa inyaka arur asünung kinü tanur ama Ni parnok sayutsüngitsü menüngdaker. Yamaji Ni-a tain asünung kü junior koma sayutsüngitsü ibajia kü dang mesayu yonga ajungtsü. T. Atu-i ashiba ama iba ken-o sentakba nung imtsü-yimpu kar-i arua kü dang tashitsü tim-o kar ashitsü nungdaka lir-a arua ashinüngbo ibaji Ni asoshi maongka tülutiba asütsü. Kechiaser shisatsü tajungbo Ni kanga angazükner.
3. Ni Nagaland Tribes Action Committee (NTAC) nung tongti zülur ta T.Atu Jamir-i angazükbaji-a shitak. Saka NTAC-i ULB election den sentakba nung koba ken-o sa aser koma jembi, aser kechi wadang inyaka arur anendaka lir, ajakbo pai junga memetet südi. Tongti zülur ka ama, NTAC-i tanü tashi kechisa Naga nunger temeten wazüka ayutsü asoshi inyaka arur, record tejangja lir aser nüngdak dang item record nung ajemdaker jembitsü. Saka Ni inyakba NTAC mapa aser kü chamber nung kü kübok inyaker Wati Jamir aser Imkong Jamir nati Court nung ken-o agizüka jembiba anaji khenyongi tesentaktep mali. Tanü koba ken-o Court nung benoka lir, iba asoshi tenati kü dang asüngdanga agizükba-a masü aser Ni tena dang agizüka inyakang ta-a shia mali aser ashitsü-a menüngdaker. Tenati kechi ken-o agizüka jembidaki, ibaji Okatsür tim mapa ka dang inyaker ta Ni shiteter.
Ni inyakba NTAC mapa aser kü kübok inyakertem Okatsürtem-i parnok molungka nung inyakbaji meputeper ta T.Atu Jamir-i shiteter süra , ken-o High Court nung aguja yur kulen Ao Senden dangi iba ketsa ken-o nung shiti züluba aser osang kakettem balala nung tai tangatetba aser tangar amajok nung tenüng menükja adokbaji-a putep asü meputeper bilemdang nung junger. Kari tim mapa inyakbabo tai amai ajitet aser shitakba aibelena inyakbabo kecha tai majitet ta asüba jakla jagi nü dak aliba shisatsü, molungsentsü aser nükjidongji jangja-jangja-a sayur.
4. T. Atu Jamir-i Ni anema, Aoer aser Naga nunger Okatsür anema zülubaji okadak (court) ken-o benoka jembidi süra (legal action) lemang aisü lir, saka tanga kin aser nübor tepu mesüngja asen Aoer o Aoer na lutsütepba aser anemtepa inyaktepba aser zülutepba nung jangratem mali ta tangatetba ali nung tangbo iba mapaji meinyaki atar. Saka tesülen nüngdak adokra item mapatem inyaktsü rata-a mali. T. Atu Jamir-i ozü chamber anema dang masü, saka Naga nunger okatsürtem ajak sensaja zülu nung Naga nunger okatsürtemi kechi pa dang asüngdangtsü memetet, saka Ni kechi züluogo ibaji kü tangatetba aser idakji Ni masetshi-i nokdaka lir.