BJP-i Nagaland nung sorkar kümtettsü aser terenlok bener arutsü

Kohima, August 30 (TYO): Bharatiya Janata Party (BJP)-i ochimashi maliba sorkar ka kümtettsü aser Nagaland tejakleni anitsü ta tanü tenangzükba agiogo.
“Nagaland nung 2018 State general elections sülen BJP-i sorkar kümtettsü aser ochimashi maliba sorkar ka agütsütsü. Centre sorkar nungi aruba welfare schemes inyaktsü aser Nagaland nung terenlok bener arutsütsü” ta BJP general secretary (organisation) incharge of North East, Ajay Jamwal-i sangdong ka nung metetdaktsü.
Taküm July 28 nungi August 28 tsüngda Jamwal-i Nagaland kübok district headquarters 11 aser Assembly Constituency 60 prongla sema senzü aser pai ashiba agi, Nagaland nung gari lenmang tia kanga majung aser sector ajak nung infrastructure development mali.
Education, power aser health care delivery system tem nung infrastructure development mali, ta paisa shisem.
Nagaland nung BJP lennirtem aser züngsemtemi kanga dang meranga inyaktsüla. Swacch Bharat kübok shilem ka ama yimdong merüktetba dang masü saka BJP sorkar ka kümtettsü atema nübortem tangatetba melendaktsütsü atema meranga inyaktsüla. Iba jagi dang terenlok bener arutsü, ta Jamwal-isa metetdaktsü
Prime Minister Narendra Modi-i peoples’ welfare schemes 120 tashi tenzüktsüogo saka itemji nübortem tonga arur asü masü’ar temulung malemer. Iba asoshi state BJP lennirtem aser züngsemtemi district administration den ajuruteptsüla aser Central scheme tem takok ngua inyaktsü atema mita reprangtsüla, ta paisa ashi.
Nagaland nung BJP lennirtemi party tangatetba aser inyakyimtem kanga junga metettsüla aser BJP-i tamangba yimsü, kin aser kidong telemsa melii inyaker, ta asüba osang nübortem dang tejangja sangoktsütsüla, ta Jamwal-isa metetdaktsü.
2018 elections nung BJP candidate temi sen meindoki aser vote malizüki takok angutsüji kanga tasak asütsü, anungji BJP-i tangbo clean election campaign indang mejembitsüla aser BJP sorkar tentetba sülen ang iba onük benok nung tajungba asütsü, ta Co-operation, Relief and Rehabilitation, MARCOFED Minister, Imtilemba Sangtam-i o jembidang ashi.
Ajisüaka, Nagaland ya Khristan state ka asünung, Khristan tesayuba aser tangatetba sülen anidakra clean election mesüra vote alizükba indang onüktem jembitsü nüngdak madoker, ta paisa shisem.
Nagaland nütsüng yongsük nung shilem 46 ji tetsürtem lir aser tanü BJP senden nung tetsürtem balaka dena lir, anungji party-i tetsürtem party nung anioktsüla kechiyong tetsürtemia vote agürtem anidenteter, ta Imtilemba-isa shisem.
Paisa BJP lennirtem dang züngsem kar anenja aliba aser meindokba meyipa agitsü mepishia metetdaktsü.
Nagaland nung NPF den yaritepa sorkar ketdangsüa aruyonga, sorkar nung BJP MLA tem alibaji tenüng atema dang, kechiyong onok nem portfolio tajung lemzükja mali, ta Imtilemba Sangtam-isa shisem.
BJP secretary (organisation) in-charge of Nagaland, Ananta Narayan Mishra-ia party züngsemtem dang taruba election nung BJP sorkar ka kümtettsü atema mapa inyaktsü tayongzükba agütsü.
Paisa Party lennirtem dang pei pei kidang BJP wako atsüktettsü aser ibaji ajanga Nagaland nung BJP ajungkettsü ta Mishra-isa shisem.
Nagaland BJP President, Visasolie Lhoungu-ia o jembidang, “nübortemi party agizükdar aser state ajungalen party indang inyakyim, tangatetba aser alizüngtem angateta odar,” ta ashi.
Iba sentong nung mendenji State BJP vice president, Cheong Konyak liasü aser CBCK pastor Rev Dr Kevekhalo Lasuh-i temoatsü meshia sarasadem, Vice President Kuputo Shohe-i tesentepertem pela agizük, Eduzu Theluo-i general secretary report metetdaktsü aser vice president Imsü Yaden-i anküp tepela o jembi.
Tanü BJP senden nung bangzüng kar renem aser itemji,
1. Khristan tangatetba nung ammettsü aser Naga nunger sobaliba aser yimyatem kümzüka ayutsü.
2. Prime Minister, Narendra Modi-i Independence Day Speech 2017 nung tamangba yimsü tenüng nung ozüng alema inyakba aser reshikangshiba magizüktsü ta ashiba pusema nungittsü.
3. Loktiliba nung tangar memenepertem ajungkettsü, kechisarena ajaklen terenlok bener arutsü aser sorkar ketdangsübaren timi inyaktsü aser ano NBCC-i ayongzükba Clean Election pusema nungittsü bangzünga renem.
4. Prime Minister-i tekaratiba nung telemtetba ka agitsü atema tenzüka inyakba yimjung maparen pusemtsü.
5. Prime Minister Narendra Modi aser National Bharatiya Janata Party President Amit Shah aser State BJP President Visasolie Lhoungu nungertem lenisüba akangshidaktsütsü. BJP Nagaland-i to Lhoungu lenisüba kübok Nagaland General Assembly Election 2018 nung takok tulu angutsü tamang akar aser pa nungita yaritsü.