Nagaland ajungalen NEPEx Mega mock drill agiogo

Mokokchung nung alima lendongtsüdong balala atalokdang kümdanga alitsü aser meteta alitsüyim sentong ka agiba mapang tangokba noksa nung angur.

Kohima, August 30 (TYO): Nagaland ya Seismic Zone V kübok lir aser iba atema Nagaland State Disaster Management Authority (NSDMA)-i District DMA tem, sendaktepa aliba department tem, civil societies aser nisung balala den yaritepa district headquarter ajak nung mega mock drill agiogo.
Nagaland Emergency Preparedness Exercise (NEPEx) ya Nagaland nung 8.4 magnitude menoknok ka anoknungbo ta asüba nung ajemdaker agi.
Tanü mock drill agiba sülen medical, fire services, police, administration aser disaster response force ketdangsertem den Home Commissioner & Additional Chief Secretary Temjen Toy-i ajurutepa senden ka amendang, mock drill takok ngua agiba aser iba mapang metokmeperi aika ngutetba osangtem lemsatep.
Iba exercise ajanga atangji menoknok anokdang state-i terenemtsütem renema atatsü meteokmeperitem aika ngujema liasü.
KOHIMA: Kohima district nung mock drill ji IG stadium tesem nung agia liasü. Iba nung Deputy Commissioner Kohima-i Response officer (RO) aser Additional Deputy Commissioner Kohima-i Incident Commissioner (IC) ama shilem agi.
Tanü mock drill exercise mapang Planning section, Operation section, Logistic section, Response branch, Air operation section, Medical unit tem tentet aser Kohima Science college NCC group, Polytechnic aser DEF temi yaritep.
DIMAPUR: Dimapur nunga tanep 11:00 ako nung siren ola agütsü aser iba sülen Deputy Commissioner indang conference hall nung Emergency Operation centre nung mapa tenzük.
Idakji Dimapur DC, Kesonyu Yhome-i rongdak senden ka jatep aser DDMA Dimapur züngsemtem aser HODs den lendong osang lemsatep.
Iba exercise atema Indoor Stadium Sports complex Dimapur ji staging area ama lapok aser DDSC stadium nung relief camps lapok.
Hongkong market, Vishal Mart, Marwari Patti, Don bosco school, Nikos hospital aser sorkar office 8 nung task force teloktemi mock drill agi.
MOKOKCHUNG: Tanga district-tem den külemi Mokokchung nunga alima lendongtsüdong tapu balala atalokdang kümdanga alitsü aser meteta alitsüyim (emergency preparedness exercise/NEPEx) sentong takok ngua ayongzüka agiogo.
Iba sentongji Mokokchung town telungtet tesem pezü nung lemsar agi. Mayangnokcha GHSS nung lendong atalokba mapang nisung taküm mesamai school ki koma azüngtettsü (evacuation exercise) iba indang sayua liasü; MMC complex nung ki tadem aika aliba nung apu aser sangzü agi nisung taküm kümzükba indang sayua liasü (leaning ladder, collapse structure & rope rescue).
Mokokchung D.C complex tasenba nung mi lendong tulu atalokba mapang kümzükba indang sayu (high rise fire rescue) aser Guruwara nung nisung alidak kitsük kirong lendong atalokdang koda kümzükba mapa inyaktsü, iba indang sayua liasü.
Mokokchung Imkongmeren Sports Complex rostrum nung main control room mesemteter iba nungi NEPEx/mock drill maparenji inyaka liasü. Tanü iba sentong nung district administration-i anir department balala nungi timsür aser temulungertemi shilem agia liasü.