Tanur ka atema Green Corridor lapoktsü

Guwahati, September 3 (Agencies): Deobarnü Guwahati nung ambulance ka nung ita pezü tanur kanga mejungi shiranger ka bener Lokopriya Gopinath Bordoloi International (LGBI) airport oya aliba nem Kamrup (metro) district administration-i kecha tetsükdakba makai gari kera kera otettsü atema green corridor ka agütsü.
Iba sülen tayimtsü ambulance kati iba teburchanusang; Snigdharaag Bhuyan aser tsürapur New Delhi-i temang anepalutsü atema Gangaram mozüki-i anir ao.
Senior superintendent of police (traffic) Amanjeet Kaur-i iba maparen ya achaayanga inyak aser parnoki Pratiksha mozüki nungi LGBI airport tashi km 33 talang green corridor ka lapoktsü aser police gari teneti ambulance meiner yok.
Iba tanobusang ya acute pneumonia agi shiranger aser pa Guwahati mozüki nung anogo 15 tejakdang admit asü aser idakji intensive care unit (ICU) nung yua liasü.
Iba amala maparen ya Assam nung mezüngbuba inyakba lir.
Maneni iba mesükba ‘green corridor’ ya New Delhi nunga tanobusang ya airport nungi Gangaram mozüki-i anir aodang agütsütsü, ta ketdangser osang ajanga metetdaktsü.
Assam chief minister Sarbananda Sonowal-i ashiba agi, state-i iba tanobusang temang anepaludang indokba sen ajak agütsütsü. Chief minister office ajanga New Delhi nung Assam Bhawan, resident commissioner dang tanobusanger kinungertem nem tenüngdakba teyari agütsütsü asoshi metetdaktsüogo. Parnok ya Assam kübok Biswanath Charilai tesem nungi lir.
Prime Minister Office nungi tetuyuba agütsüba sülen ita ishika tejakdanga Assam nungi tanur ka nem kasa maongka agüja liasü shiba New Delhi nung ariport nungi Gangaram mozüki-i anir aotsüba liasü.