Lisopur Ola-2 (Indigenous Voice 2)

– N.M.Jamir, Advocate, Chairman, Nagaland Indigenous People’s Forum.

Linük asoshi apusoang, pei senso kin ajaki… aramesoang senso tajungtem, Kintem ajak aramesoang. Tanü Nagalima tia tajemrepa nungi saktsü asoshi senso shia pei tangatetba nung alima asoshi mapa inyaktsüla. Nagaland State ya azü agi alangzükba State ka lir. Asen Otsüla, Oboula nunger chiamejemi langri kanger arem nung lung agi tekülak metanga mejanga India sorkar den tongpang tulu (Political War) noktaka alangzükba State ka lir. Iba yongji Nagaland State nem temeten balaka Indian Temzüng (Constitution) nung wazüka yuja lir. Ibaji Ao agi yamai meyiptsüdanger.
Naga nunger tamangba Yimsü mesüra lokti liba yimsüyimpong , Naga nunger sobaliba temzüng ozüng yimya, Ken-O sobaliba yimsü ajanga telemtet agiba aser ali aser iba nung aliba ali temotem dak sentakba nung Indian parliament ajanga ozüng renemaaka (Act) Nagaland Tatar temi (Nagaland Legislative Assembly) nung Pangzüng (Resolutiion) ajanga dang Nagaland nung inyaksangshitsü akok. Iba amai Indian temzüng nung asen Naga nunger temeten wazüka yuja liaka tia maka, tanü asen Naga nunger lenirtemi anir sorkar ketdangsür tulu tila aser nüburtem ajak ochimashi (corruption) pei tajangzük aser pei ajung dang asa inyakba (Nepotism and favoritism) agi jung junga mesepoko. Centre sorkari sen meyoker masü, 2016 April nungi 2017 March tashi nung Department tersür ka (11) agi sen 2355 crores agizüka agiogo aser mapabo kecha meinyak. Item Department temji item ya lir; Road & Bridges, Social Welfare, School Education, Planning, Police, Rural Development, Irrigation, Civil Supply, Urban Development, PHE aser Medical Department. Tesüngmangtsü kaji ita ter tsüngda nung Roads & Bridge Department-i apu aser lenmang yanglutsü atema sen Crore 342 agizüka agioko (2016 – 2017) aser Rural Development-i yimtsüng terenlok maparen atema sen Crore 719 agizüka agiogo (2016 – 2017). Ano neburtemi metettsü kaji, Nagaland nung High Court ki tasen yanglutsü atema 2007 küm Meriema, Kohima nung lung azüngtsüogo. Iba kasa küm 2007 nungsa Tripura, Manipur aser Meghalaya State tem-a High Court tasen yanglutsü atema lung azüngtsü aser item State tembo High Court Building renemer pei pei High Court kümtetta lapoka lir. Asen Nagaland State nungbo High court ki yangluba maparenji 55% dang renema lir ta Law Department-i shiti ka ajanga shia lir, süra ano asenok High Court ki renemtsü atema küm kwi atatsü?? Aser High Court yanglutsü atema Bank mesüra Financial Institution dang sen apuang ta Law Ministry, Govt. of Indiai shia lir mali?? Detail Project Report (DPR) yanglur Law Ministry nem agütsüra senji angutsü ta asenoki angatettsüla. High Court tasenba yanglutsü atema tanü tashi nung sen kwi Financial Institution dang apuzüka lir ibaji Nagaland sorkari sentsühji memenoktsü ta ken O okadak benoktsü aser tim masü inyaka lira bushisüngdangtsü.
Asenok Ao sünak abener joko nangri kanger ochiba dang rangloker, Tsüngrem dang teyari meshir linük asoshi apusodi. Tsüngremi asen Aor moajang !!!