CM-i Air India aser Indigo ketdangsertem den ajurutep

Dimapur, September 6 (TYO): Nagaland state nung Air Connectivity tajungba kümdaktsütsü atema Chief Minister, T R Zeliang-i Air India Chairman & Managing Director, Rajiv Bansal, Indigo Airlines Vice President Rajat Kumar aser Indigo Airlines Chief Commercial Officer, Sanjay Kumar nunger den ajurutepa senden ka amen.

Iba mapang Chief Minister-i Air India aser Indigo Airlines dang tayimtsü talila agütsütsü aser tetsükdaktsü melii tayimtsütem senzütsü atema mepishia metetdaktsü.

Air India CMD, Rajiv-i Dimapur-Kolkata flights tetsükdaktsü melii senzütsü aser Guwahati adena Delhi tashi tayimtsü ka senzütsü atema sentong atongtsü ta nangzük.

Indigo indang Delhi- Dimapur anepdang senzüba tayimtsüji Kolkata nung khen anenzükerbo indangindanga aoer saka Delhi nungi iba kasa tayimtsü mesenzür. Iba jagi senzüsenbongertem timtem ajurur, ta TR Zeliang-i Indigo ketdangsertem dang ashi.

Idangji Indigo ketdangsertemi Chief Minister dang Indigo air operations nungitba atema pelaba metetdaktsü aser tan ita tatemlen direct return flight ji tenzüktsü ta nangzük.

Air India CMD aser Indigo ketdangsertemi Nagaland nung Air Connectivity tajungba kümdaktsütsü ta CM dang ashi.

Tanü TR Zeliang-isa RK Puram, New Delhi nung Nagaland House Building tasen semdang aser Construction Firm- Confoss Constructions ketdangsertem den ajurutepa sensaksem.