Raliwalirtemi India-i marudang yongi nashi shi achitsüla: KJ Alphons

New Delhi, September 08 Agencies): Tang tasen shimba, Tourism Minister, KJ Alphons-i bendanger raliwalirtem dang India linük mesemdangdang yongi pei linük nung nashi shi achitsüla, ta ashi.
Anogo asem tejaklen pai, State tem nung chiyungtsü code mali aser Kerala aser Goa ama state tem nungbo maneni nashi shi melatsü, ta jembia liasü, ajisüaka tanübo pai bendanger raliwalirtem dang India-i apusoa marudang yongi peipei linük nung nashi shi achitsüla, ta ashi.
Bhubaneshwar nung Indian Association of Tour Operators mongdang tembangba sülen osangbenertemi pa dang, India nung nashi kümzükertemi nisung tepsetba tatalokbatem aser state aika nung nashi shi nokdangba ajanga linük tourism nung koma kongshir? ta asüdanga liasü.
Ibaji langzüka Minister-i, “Parnoki (tourists) peipei linük nung nashi shi achitsü akok, iba sülen yagi (India) arutsü akok,” ta ashi.
Taoba Deobarnü Ato kilonser, Narendra Modi-i aniba sorkar nung pa minister tenangzükba agiba sülen Hombarnü pai, “BJP-i state shia nung chiyungtsü ‘code’ magütsür. Goa Chief Minister-i jembiba ama, Goa ya nashi shi achiba state ka lir aser Goa nung maneni nashi shi achitsü. Kerala ya nashi shi achiba state ka lir, aser maneni nashi shi achitsü. Item tesem nung nüburtemi aji achir, aser iba atema BJP atema timtem kecha mali,” ta jembia liasü.
Ajisüaka anogo asem lirbo pai o peleptepa jembiogo.
Tourism Minister atema tenangzükba magidang KJ Alphons-i, “Kerala nung maneni nashi shi achitsü,” ta jembia liasü.
Osangbenertemi pa dang pai tamalen jembiba o lepshia shia asüngdangba ka langzüdang pai menüa, “Ni chiyungtsü minister masü, saka Tourism minister lir,” ta ashi.
Bendanger raliwalirtemi kanga sapua semdangba state anaji Goa aser Kerala na lir.