Hurricane Irma-i Cuba nunga kongshiogo

Havana, September 09 (Agencies): Caribbean asetkong aika nung teraksa tulu bener arutsüba sülen Hurricane Irma ya Cuba tonga aruogo aser iba linük nung mopung tashi tait aonba den tzünglu tesashi arur.
Iba yipru Category 5 ya Cuba north-east tsütsü aliba Camaguey Archipelago nung mezüng kongshi.
Iba yipru nungi jenpua alitsü asoshi Florida nung aliba nütsüng million 5.6 dang iba state toktsür aotsü shiogo. US nütsüng shilem 25 bo Florida nung lir. Caribbean tsütsü iba yipru tesashi ajanga nisung 20 taküm samatsüba osang jangjaogo.
Irma yipru ajanga Sabana-Camaguey Archipelago nung Hokulbar aonungb kongshi.
Cuba nung category 5 yipru agi kongshiba nung tang ya mezüngbuba lir aser Honibar anepdang iba yipru tajemba aküm, saka Florida atongdang iba yipru tashi taitba akümtsü südi, ta ashir.
GMT 12:00 ako nung Irma yipru indang mopung ya tekeraba liasü aser iba mapang mopung ya ghonda ka nung kilometre 209 tashi kera aon, ta US nung aliba National Hurricane Center ajanga ashi.
Iba ajanga Cuba nung tesem kar nung tzümetsüng adoka lir, ta osang ajanga ashi.