2017 küm nashi dak sendakba ken o teimba atalokogo

New Delhi, September 16 (Agencies): Rajasthan kübok Alwar nung nashi mamatzü yima ayoker Pehlu Khan tepsetba atema nisung trok dak tai tongloktsü saka parnok shingaia aibelen masü ta Rajasthan Police-i oshidang agütsüogo.
Taküm küm nashi dak sendakba tatalokba mezüngbubaji April 1 nü Alwar nung nisung telok kati nisung tepsetba liasü, saka tesüiba ita trok tsüngda iba dak sendakba tatalokba tamajungtibatem atalokogo, ta IndiaSpend.com-i metetdaktsü.
2010 küm nungi tenzüker nashi dak sendakba tatalokba 78 tashi liasü aser item rongnung 35 ji 2017 küm kija atalokba liasü ta parnokisa bushitetba osang ka nung ashi.
2012 aser 2013 nung nashi dak sendakba tatalokba ka ka liasü aser 2014 nung asem atalok. Ajisüaka, 2015 nungi nashi dak sendakba lendongtem atalok aser iba küm 13 tashi atalok. Iba sülen 2016 nung tatalokba 16 aser 2017 nung 35 tashi atalokogo, ta IndiaSpend.com-isa metetdaktsü.
Osang ajanga ashiba agi item lendong nung tasürtem rongnung Muslim nunger 87% liasü. 2010 nungi tenzüker tang tashi nung nashi kümzükertem ket nung nisung 30 süogo aser parnok rongnung 26 bo Muslim nunger liasü.
2010 nungi ken o 78 tashi benoka aliba nung nashi dak sendakba nung takoksa ajurur 36 anema police-i ken o benok.
Nashi dak sendakba tatalokba 78 nugi 76 ji May 2014 nung Prime Minister Narendra Modi-i aniba sorkar tashi aruba sülen atalokba liasü aser ken o noklang nung shilem 52 ji Bharatiya Janata Party (BJP) sorkar aliba state tem nungi liasü, ta ta Indiaspend.com-isa metetdaktsüogo.