Acharya-i Modi den tepela tasoba anogo salem lemsateper

Dimapur, September 16 (TYO): Nagaland aser Arunachal Pradesh Angh, P.B. Acharya-i Nagaland nung alirtem ajak tenüng nung India Prime Minister, Narendra Modi den pa tasoba anogo salem metetdaktsüogo.
Modi lenisüba kübok ‘New India’ kümdaktsütsü atema Nagaland-ia meranga mapa inyakdar, ta PRO, Raj Bhavan sangdong ka nung metetdaktsü.
May 2014 nungi na Prime Minister inyaktsü tenzükba sülen asenoki aika ajangtetogo. Wadang balala nung temelenshi bener aruba ajanga ‘Bullet Train’ nungi ‘Dream New India’ atema lenmang lapokogo, ta Acharya-i Modi dang ashi.
Taküm Modi indang tasoba anogoji Viswakarma Puja nung amunger aser iba ya Viswakarma indang benjungmung lir. Modi ya ‘New India’ yanglur ka lir aser iba atema nübortemi nüma tanga bilemer, ta Angh-isa shisem.
Linük tajungba nung yangertsü atema tsüngremi nü nem anema aliba taküm aser arishi talang moajang ta sarasademtsür, ta Acharya-isa Modi dang ashi.