Tir Ram Nath Kovind-i state pongu atema Anghtem shim

New Delhi, September 30 (Agencies): Honibarnü linük Tir, Ram Nath Kovind-i Assam, Tamil Nadu, Bihar, Arunachal Pradesh aser Meghalaya state tem atema Angh tasen shimogo, ta osang ka ajanga metetdaktsü.
Paisa Andaman & Nicobar Islands atema Lt. Governor tasen ka shimogo.
Tiri Tamil Nadu atema Banwarilal Purohit Angh shim. Maharashtra Angh, Ch Vidyasagar Rao-i Tamil Nadu Angh mapa repsema bena liasü, ajisüaka state yimtenren nung mepetmesü adokba sülen state atema temeja Angh ka khanga liasü, aser tang iba takhangba ataloktsüogo.
Ano Bihar atema Satya Pal Malik Angh shimogo, pa ya taoba mapang MP aser BJP national tatong Tir inyaka liasü. BJP nungi linük Tir candidate asoshi Kovind shimba sülen iba menden tazüng adoka liasü.
Maneni Brigadier, BD Mishra (Retd) Arunachal Pradesh Angh aser Ganga Prasad Meghalaya Angh shim. Ganga ya taoba mapang Bihar Legislative Council nung züngsem liasü.
Jagdish Mukhi-i Assam Angh, Purohit melentsü. Mukhi ya Andaman & Nicobar Islands Lt. Governor inyaka liasü aser Admiral (Retd) Devendra Kumar Joshi-i pa melenzüktsü.
Bihar Angh asoshi shima alisang, Satya Pal Malik-i, “Ni kü nem nungloktsüba khuretji meteta lir aser ni ibaji tajungtiba agi inyaktsü,” ta metetdaktsü.
Ano Antaman & Nicobar Islands atema Admiral (Retd) Devendra Kumar Joshi, Lt Governor shim.
Tir office nungi sangdong ka ajanga, “Pei pei office atema parnoki tenangzükba agiba anogo nungi tenzüka parnok mapa abentsü,” ta metetdaktsü.