Yaongyimsentsür lokti senden sentong tembangogo

Dimapur, Sept.30 (TYO) : Yaongyimsentsür Telongjem 3 buba lokti senden Brehostibar aonung nungi tenzükba sentong ka Hokolbar aonung Yaongyimsen yimtak temoatsü aser takok manung tembangogo.
Iba senden sentong nung tongti tesemdanger Parliamentary Secretary, Wb.Ishak Konyak kinungtsü Wt. Ayangla.C. liasü. Lai Hokolbar anepdang mezünng sentep sentong nung jembidang, tetsür shia dak ajemalu aser taremzük shisatsü aliba ajanga kibong dangi temoatsü arur ta lai metetdaktsü. Laisa tetsürtem dang kibong nung kinungbo, tanurtem aser ano yimten aser lokti asoshi teti sarasademtsütsübaji pei sübotsü ama akümtsüla ta tayongzükba agütsü.
Iba lokti senden sentong nung tongti o jembir, Alemla Samuel-i jembidang, Tsüngremi tetsü ka nem pei kibong nung tanurtem anitettsü aser lokti aser yimten nüngdak nung yaritsü asoshi shisatsü balaka agüja lir, anungji ibaji meteta kibong, lokti aser yimten anepalutsü aser Tsüngrem o nung indaktsütsübaji tetsü ka asoshi teinyaktsü tongtibang asütsü ta lai metetdaktsü.
Iba sentong nung Yaongyimsen tetsür naklo ken toktepba aser teka agi yanglutetba mapatem nunga tetoktepa liasü. Iba sentong shibangba sentong Dimapur Yaongyimsentsürtemi agia liasü. Iba kasa lokti senden ya 2022 küm alitsü.