M&PB, NPF-i Y Patton aitsür

Dimapur, October 1 (TYO): Mon nung Y Patton-i o jembidang Kiyanilie Peseyie asüba atema pelaba aser pa asüba ajanga assembly nung Naga People’s Front züngsem ajemogo ta ashibaji kangasa majung aser tasür kinungertem temulung yirutsütsü atema jembiba liasü. Küm 10 tashi inyaksema aruba yimsüsür kati iba ama o jembiba ya tim masü aser aitsür, ta Media & Press Bureau, Naga People’s Front, Central Headquarters sangdong ka nung metetdaktsü.
Yimsüsür kati külem medemer ka asüba nung maongka agia pei ajangzüktsü merangbaji taoksatsüka lir aser kasa mapang nung Naga nunger sobaliba alema lir, kechiyong asenoki tasürtem nem akhümtsübu agütsür, ta parnokisa ashi.
Talisa, Konyak Naga nunger tongti benjungmung ka political rally kümdaktsübaji tesasatsüka aser benjung ayongertem mezüngmeshiba lir,
Y Patton pusema nisung kari social media nung pai jembiba onük yanglushir prokshir saka ibaji khenyongi tiyazü lir. Pai jembiba onük ajanga pa tangatetba sayur kechiyong pai 2018 elections nung pa NPF ticket aser tamaitsü noksa amer tokteptsü ta jembir saka pa den par telok nung züngsem teimbaka party nungi anentsüogo mesüra agienogo, ta M&PB, NPF sangdong nung shia lir.
Ibaji arogo ka nung züngsem kar züngsem agienba sülen parnoki ketdangsütsü ta jembiba den saku lir, ta parnokisa shisem.
Yimten telok ka nung Legislature Wing ji Youth Wing mesüra Women Wing ka ama dang lir aser parnoki parnok adenba yimten telok madak ketdang asütsü makok.
Y Patton-isa Dr Shurhozelie ji Nagaland Legislative Assembly nung züngsem mesüaka MLA temi pa Chief Minister kümdaktsü ta jembi. Dr Shurhozelie-i 2013 küm electoral politics nungi anenba nisung ajaki meteta lir, saka taküm küm tetenzüklen MLA temi ULB elections onük mekoktetba ajanga February 15 aonung parnoki Dr Shurhozelie dangi aru aser pa dang Chief Minister menden melenzüker parnok kümzükang ta mepishi. Iba aonung TR Zeliang dang chief minister menden yujang ta ajangajanga ashirtem rongnung Y Patton dena liasü, ta M&PB, NPF-isa metetdaktsü.
Dr Shurhozelie lenisüba kübok tensa süngjema akümba sülen kechiba kasa MLA temi pa menden nungi atsüzüktsü atema mapa inyak ta asüba atema tasüngdangbatem lir. Dr Shurhozelie-i aniba sorkari ochimashi inyakyim azüoktsü, backdoor appointments nokdangtsü aser MKR Pillai ken o CBI nem agütsütsü telemtetba agiba ajanga parnoki pa menden nungi anentsü, ta parnokisa ashi.