ACAUT Nagaland-i Lokayukta indang Standing Committee den senden amen

Dimapur, October 2 (TYO): Nagaland nung Lokayukta tentettsü atema Standing Committee den ACAUT Nagaland senden ka September 26, 2017 nü Secretariat Assembly nung amen.
Senden nung mendenji Er. Levi Rengma, (Parliamentary Secretary, Housing) liasü aser senden nung ACAUT Nagaland-i Lokayukta indang tashi aser inyakyimtem atema tebilemtsü abenba onüktem lemsatep, ta tanü Media Cell sangdong ka nung metetdaktsü.
Ochimashi nokdangtsü aser azüoktsü atema Lokayukta dak tashi peria alitsüla aser iba kübok Investigative wing, Prosecution wing alitsüla aser Lokayukta-i parnok sasa ken o tem benoka angadangtsü atema tashi agütsütsüla, ta ACAUT züngsemtemi ashi.
ACAUT züngsemtemisa appropriate authority clause agien nungdang Lokayukta agizüktsü ta ashi. Onüktem benoka olemtepba sülen Lokayukta yangluba sub-committee-i October 7, 2017 nü taruba senden amentsü telemtetba agi.
ACAUT Nagaland-i Lokayukta indang sub-committee nem agütsütsü atema onük kar yanglutsü aser iba mapa metembang tashi “All Nagaland” lungkak aittsü ta public-i lemtetba sota atar, ta Media Cell sangdong nungsa shia lir.
Lokayukta Bill tekaratiba nung mapa küma tenzüktsü atema ACAUT Nagaland-i kanga dang nendaka mapa inyaker, anungji Nagaland state sorkari Lokayukta Bill mapa küma tenzüktsüba nung mapang meindoktsü nenshia metetdaktsür. Maneni, Nagaland sorkarisa June 6, 2016 sülen backdoor appointment ajak anentsütsü nenshia metetdaktsür, ta ACAUT Nagaland-isa ashi.