Khristan lanurtemi politics nung shilem agitsüla

Nigeria nung lanurtem sentong ka nung taoba Angh kati Khristan lanurtem dang Tsüngremer raraba sübotsü ajak sübor politics nung shilem agitsü ayongzük. Ajisüaka, paisa ochimashi mapa inyakba yimsüsürtem den külemi teka amteper Khristantemi politics mapa inyakra, temeneni parnok melamala samatsütsü ta tekümdangtsü olen ka shisem. Khristantemi Tsüngremer raraba sübotsü ajak sübor politics nung shilem agitsüla aser iba jagi linük nung temelenshi bener arutsü ta pai metetdaktsü. Angh-isa lanur ka ama nenok dak asalentong aika lir aser nenoki mangdangtem tongtettsü atema tashi lir ta lanurtem dang ashi. Lanur asüdang politics nung shilem agitsüla kechiyong lanuwa mapang süir politics nung shilem agira, nai bilemba aika meinyaktettsü ta paisa shisem. Atangji, iba nisungi jembiba onükji shitak lir aser tanü Nagaland tensa den-a asenoki medemdangtsü akok. Asenoki reprangdangra Nagaland nung sorkar yimsüsür aser ketdangsertem ya aika chichiba Khristantem memesük inyaksangshir aser iba jagi tanü asenok tensa tamajung ka nung lir. ‘Nagaland Khrista asoshi’ ta yimyim ayimmoktsür joko küm aika süia arur saka asen lima nung ochimashi aser tashiyim agi süngogo. Tema tazütsü atema Yisu Khrista aser Khristan ta asüba tenüng amshir dang ashi, Naga nunger aika tema nungdang Khristantem lir. Tanüngba nübortem yutsür, sorkar yimsüsür, ketdangsertem aser lennirtemi chichiba Khristan ka ama inyaksangshia aru asübo aser litet asübo Nagaland ya kotak ama kümer lila, saka tia maka tema tazütsü atema dang Khristan sür aliba ajanga tanü asenok iba ayatai tia ka nung alitsüsa kümogo. Nigeria nung lennir jagi Khristan lanurtem dang politics nung shilem agia par linük nung temelenshi bener arutsü ayongzük aser kasaji tanü Nagaland nunga nüngdaker. Lanurtemi sorkar yimsüsüba menden nung shilem agitsübaji kanga dang tongtipang aser iba jagi temelenshi tulu bener arutettsü. Nagaland nung ita ishika dang lir sorkar melentsü atema assembly election agitsü aser iba atema nisungtemi candidate ama tokteptsü telemtetba agiba aser tokteptsü mulungteter sentong atongba mapang ka lir. Asen lima kanga mejungi raksaogo aser iba ya nisungi masü saka Tsüngrem tashi ajanga dang yanglushitettsü. Iba mapa inyaktsü atema chichiba Khristantem nüngdaker. Nagaland nung sorkar menden nungi shir maparen ajak nung Tsüngrem akhümtsübuba aser ochishir Khristantemi shilem agitsü kanga nüngdaka kümogo. Asenoki yamai dang lia ora, Tsüngremer terasaba anogo ajurutsü menua mali. Anungji, iba ama anogo majurudang asenoki asen lima merüktettsü aser shitakba ‘Nagaland Khrista asoshi’ ta ajatsüsa asen lima yangertsü asoshi mapa inyaktsü mapang tongja tongogo. Iba mangdang asangsang nung ataloktsü atema Khristan lanurtemi tongti shilem agitsüla aser sorkar ketdangsübaren nungi ochimashi aser tashiyim mapa agientsü atema Tsüngremer raraba sübotsü ajak sübor politics nung shilem agitsü ayongzüker. Taruba election nungjibo chichiba Khristan lanurtemi longsolongsoa tokteptsü aser takok ngua sorkar kümteter, ‘Nagaland Khrista asoshi’ ta asüba jenjang alangzüktsü atema ketdangsüa aotsü ta nükla tulu ayur.