Clean election nisan asongtsüla

Nagaland nung nisung ajaki noklang nung noklang hau ta nangzüktetba temenenji election junga magitetba temenen ya lir. Election junga magitetba ajanga Nagaland nung terenlok mapa shitak inyaka moutetter ta jembiba nung nisung ajaki hau asür. Election junga magitetba ajanga nisungtemi government-i mapa meshitak inyakba anema ola madoktetter ta jembi danga ajaki hau asür. Election junga magitetba ajanga yimsüsür tajung madoktetter ta jembiba nunga ajaki hau ta olang ajemer. Ano, election junga agitet nungbo asen lima yaa tangar lima mesüka khen nung renloka otetla ta jembidanga ajaki hau asür. Ibayongji, tangbo nisung ajaki election mapang ochishia timi pei vote peisasa pei mulungba candidate nem enoktsüdi ta jembir. Ibajia shitaka ta aikati agizüktetter. Iba temulungtetba nung nisung aika election ajurutsü yongyar. Iba tangatetba aser teimla nung ABAM tenüng nung Ao Baptist Arogo Sannükertem Telongjemi anir tang ya ghonda 7000 maneni sarasademba sentong ka agia odagi. Ano, iba denji ABAM Clean election nisan arogo ajak nung amangba purtem ki shia nung asongtsü metetdaktsüogo. Atangji, ibai kangshia mesüra kangtepa inyaktsüba mapa ka masü saka temulungertemi Tsüngrem tenüng nung sarasadema pei tetsü taso lima yanglushiba nung shilem agiba mapa ka asütsü. Ibai pei tetsü taso lima kümzüktsü asoshi tongpangi aotsü ajaba ola ka lir. Iba olaji angashia yim aika nung Clean election nisan songa odagi saka ano aika nung asongtsü metenzüki lir. Tanü asenok tsükchir tulutiba, Election mejungi agiba yagi kaketreju nung kaketshisatsü junga magütsütet tanurtem aika takidak maka kümdaktsüogo. Iba temenen yagi mozü ki junga anepalu mesütet anojungi kinunger aika süogo. Election junga magitetba tsükchiri asenok gari lenmang agi ayong kümdaktsüdagi. Iba tsükchir yagi asenok adianutem rongnung kanga meputep tenzükdaktsüogo. Iba tsükchir sobaliba nung asenok alir asünungji, joko asenok yimsüsüba menden ajak japujariba, nüktapangta aser ochimashiba menden kümogo. Iba tia nung asenok asoshi lenmang ana dang lir, kaji joko kokadokerji parnoki ashi angaa tsükchir sobaliba nung tanen maka ochimashi aser tashiyim yimsüsüba kübok alitsü asü (?)  mesüra Tsüngrem dang tashi meshir tsükchir anema raratsü ? Tang asenoki election timi agitsü bangjemtepba mapa ya asen tetsü taso lima raksatsüba tsükchir tulutiba anemaji raratsü asoshi shimtetba lenmang lir. Iba raraji tenzükogo aser amangba purtem shirnoki iba rara nung shilem agitsü mulunger maneni sarasademang aser pei kilem kolak nung Clean election nisang soang. Asenok mapaji sarasademer Clean election nisan asongtsübaji dang aser tanüngbajibo Tsüngremi inyaktsü. Ashiko, nisung aikati election nung politics mejembi maremtsü mesüra canvassing mesenzü maremtsü ta bilemba agi Clean election nung shilem agitsü menangzüktetter aser nisanjia masonger asütsüa akok. Ajisüaka, asenoki angatettsüba kaji, Clean election-i yimsüsür aser nübortem shinga politics mejembitsü ta menokdanger mesüra canvassing mesenzütsüla ta mashir. Clean election nung shilem agitsü nangzükba agi candidate bushia mesenzütsüla mesüra election indang mejembitsüla ta masü. Ochishia politics asayaba, nübortem nem political party indang tim tangatetba agüja jajaba, pei tetsü taso lima ajungtsü atema nübortem meimba aser Tsüngrem metetba candidate bushia election-i idaktsüba, candidate tajung nem vote enoktsütsü asoshi nübortem ajungshia senzüba, ochishia nübortem tenzüktsü mulungtetter electioni aiba aser vote ochishia enoktsüba ajakji Clean election tetezü aser nükjidong asütsü. Nisung kari clean election tetezü election-i maitsüla, politics mejembitsüla aser candidate shimba nung shilem magitsüla ta angateta lira, iba tangatetbaji tai asütsü. Clean election nung shilem agitsü nangzüka alirtemi balaka akhidang dang nungi tali tang ya politics aser election nung shilem agitsüla. Clean election nung shilem agitsü nangzükbaji politics mejembitsü tebang shibanger masü saka ochishia aser tasü itta politics jembitsü tebang lapoker. Iba tangatetba nung amangba purtemi kecha atsüayong mesüi Tsüngrem tenüng nung politics timi jembitsü aser election nung ochishia shilem agitsü nangzükba temaitsü ABAM Clean Election nisan asongtsüla.