Tripura election 2017 atema Congress-i renemshir

Agartala (Tripura), October 13 (Agencies): Brihostibarnü Tripura Pradesh Congress Committee (TPCC)-i taruba assembly election nung Tripura nung CPM-i aniba Left Front sorkar atsüngdoktsü atema BJP mendeni secular front ka tentettsü atema tayongzükba agutsüogo.
Congress legislative party lenir, Gopal Roy-i, “State nung CPM sorkar melentsü atema party ji Congress Party kija lir, aser iba atemaji secular aser democratic yimtenren party tem longjemtsü nüngdaker. State nung Left party tem aser BJP tashii marudaktsütsü nüngdaker,” ta ashi.
Roy-isa, “State nung nüburtemi küm 100 ajungba party tejen (Congres Party) dak maneni tamang akar,” ta metetdaktsü.
Tribal nisungtem nung ajemdaker akumba party National Conference of Tripura, Trinamool Congress aser Indigenous People’s Front of Tripura telok den Congress-i lokteptsü atema tang tejembidak lir, ajisüaka tang tashi nungbo telemtetba ka dangi maru, ta Congress lenir, Roy-isa metetdaktsü.
CPM aser BJP naji süngdong ka nung adokba naro ana mesüker, ta shia Roy-i, state sorkari Shantanu Bhowmik tepsetba ken o CBI nem magütsüner aser Centre-ia memelunger, ta aitsü.
Paisa, National Banking Financial Companies ochimashi ken o nung sen lakh aika takoksa angurtem nem temeten agütsütsü atema Centre-i meinyaker aser ibaji Tripura nung communist lenirtemi mepishiba nung ajemdaker inyaker, ta aitsü.
State nung tensa majungbaji sorkar tai ajanga lir, ta aija Roy-i, “Manik Sarkar-i aniba sorkari sensotem, talisa tetsürtem kümzüka meyuteter, iba den külemi state nung tensa tajungba makümer. Police-i sorkar tashi nung aliba party lenirtem tetuyuba nung inyaker; yangi tzüzüng-ozüng züngshia mali aser Centre sorkaria ola madoker,” ta aitsü.