Minister Vikheho-i Phesama anentsüh nung yariteptsü nangzük

Kohima, August 25 (TYO) : Mongulbarnü Roads & Bridges Minister, Y. Vikheho Swu-i Phesama yimtsüng süiba National Highway-2 nung anentsüh aludak semdang aser pai aria bilemja tekaratiba nung iba lenmang yanglutsü atema yariteptsü ta nangzük.
Tanü pai Additional Chief Engineer aser PWD (R&B) Department Engineer tem den külemi anentsüh aludak semdang aser idakji 2nd-in-Command, BRO aser Phesama nunger lennirtem den ajurutep.
Southern Angami nunger aser ano Manipur state sendaktepba lenmang nung ki 40 tema den alu aika raksatsüba atema Vikheho-i kanga sasa bilemba ashi aser tekaratiba nung Border Roads Organisation (BRO)-i lenmang yanglutsüla ta mepishia metetdaktsü.
Paisa BRO dang lenmang melenshia yanglushitsü mesüra by-pass ka yanglutsü atema mapa inyakang ta mepishia ashi.
Phesama Village Council-i anentsüh aluba tesem paidoka lenmangji agri-link road den sendakteptsü atema asüngdang aser ibaji Swu-i mulunga agizük aser nüngdakba teyari agütsütsü ta paisa shisem.
Phesama Village Council-i Naga Heritage Village Kisama atema lenmang tasen ka yanglutsü asüngdangba state sorkari agizükogo aser tzüngluruwa süiba sülen Phesama Village Council den yaritepa Department-i iba mapa tenzüktsü, ta tanü Swu-isa metetdaktsü.