Teloktep sorkar nung PM-i tashi ajak mamshiteter: Mukherjee

New Delhi, October 19 (Agencies): Taoba linük Tir, Pranab Mukherjee-i, regional party tem indang onüktem ajanga linük onük nung kongshiba atema o atsütepa jembitsüla; teloktep sorkar nung Ato kilonseri tashi sadema mamshiteter, iba den külemi minister shima portfolios lemtsüba sadema meinyakteter, ta ashi.
Yimtenren tenzükba wadang nung pai ajangshibatem den sendakba onük balala nung osangbener den jembidang Mukherjee-i, UPA sorkar kübok regional party tem indang onüktem inyaktsü asoshi timtem ajuru, aser tang-a Lok Sabha nung BJP majority süaka kasa timtem ajurudar, ta ashi.
“Teloktep sorkar nung tashimait lir, kechiyong ibaji tulubaka regional party tem lir aser item party ji peipei state sasep nung ajemdaker yangerba lir. Tongti teloktep party temji state nung single party tem lir, ibayongji regional onüktem aser linük onüktem sendakteptsü asaker,” ta paisa ashi.
Mukherjee-i, “Single-party majority sorkar ama masü, saka teloktep sorkar nung Ato kilonseri par cabinet madak tashi sadema mamshitetba densema tashi ajak sademsadema mamshiteter,” ta ashi.
Tasüngdangba ka langzüdang Mukherjee-i, “Ni shisatsübo agütsütsü akok, saka yimtenren party ka nung yakyaka meinyaktsü, taoba mapang Tirtemia yamaji meinyak. Rajendra Prasad, Dr Shankar aser Dayal Sharma, parnok ajak Tir inyaka liasü (Congress nungi), parnokia yimtenren nung ajemoktsü atema mebilem,” ta ashi.
Tawa pai züluba kaket tasen ka sayaba sentong nunga pai, paibo Congress-i tanga party tem den meloktepdaktsüner, kechiyong ibaji ajanga party maitsü samatsü, ta jembia liasü