Jacinda Ardern New Zealand ato kelonser akümtsü

Wellington, October 19 (Agencies): New Zealand First teloki lokteptsü melungba sülen Labour Party lenir Jacinda Ardern ya New Zealand ato kelonser akümtsü lir.
Ita ka tejanklen New Zealand nung election agiba nung telok katia temeja takok mongutetba sülen iba osang ya Brehostibarnü sangdonger.
August ita la ya Labour telok lenir shimba sülen arishi küm 37 tain Ardern kisüngi New Zealand First telok ya anir arutet. Lai vote shilem 35.8 nguteta seat 45 agitet.
Tang Ato Kelonser menden toktsütsü alisang Bill English-i aniba telok, National Party ajanga iba election nung shilem 46 nugteta menden 58 agitet, aser ibaji linük nung yimsü asütsü asoshi menden asem agi tajemba lir.
New Zealand First teloki menden 9 ngutet.
Iba election nung meja meja akoker maliba ajanga Winston Peters indang menden tajemba ngua aliba telok, New Zealand First-i teloktep nung sorkar kümtettsü asoshi maongka ngutet.
Peters-i liberals Labour Party busemtsü molungtet.
“Iba linük nung aliba nüburtemi temelenshi aginür, aser onoki iba nung telangzüba agütsüogo,” ta Peters-i osangbener dang ashi.
Iba maparen nung Ardern-i anu o kata shia mali aser Green Party-a Labour-New Zealand First teloktep den adentsü asoshi jembitsü lir.
Iba takok asoshi Ardern aser Labour Party dang taoba Ato Kelonser Julian Gillard-ia pelaba metetdaktsüogo.