MDFA osang: Y/A Marepkong o Zonipang S/A na final asayatsü

Brihostibarnü yangi Imkongmeren Sports Complex nung Zonipang SA o Rongpang Reju na MDFA 2nd semi final match asayaba mapang tangokba noksa nung angur. Mokokchung, Oct 19, 2017 (Noksa Agir: Imrongkumba Aier)

Mokokchung, Oct 19 (TYO): Brihostibarnü yangi Imkongmeren Sports Complex Mokokchung nung MDFA trophy tanabuba Semi final match Zonipang S/A aser Rongpang Reju na asayaba Zonipang-i goal 1-0 agi Rongpang Reju madak takok ngur final asayatsü jenjang tongtetogo.
Tanü iba asaya tenzüker mezüng asaya tesadang tatemtsü lia minute 45 shitak nung Zonipang nungi Midfielder jersey No. 11, Stephen Rutsa-i D-Box anasa nungi goal tajung ka metsüoktsü aser iba goal-ji Rongpang puri meküpdokteti Zonipang-i akok.
Mezüng asaya tesadang tenzüker minute 20 nung Zonipang puri penalty ka menasa, aser iba penalty-ji Rongpang nungi striker jersey no. 7, Temjenmereni maongka agia metsü, saka tia majung iba ball-ji goal post nung tsükdaker mai. Mezüng asaya tesadang nung Zonipang-i goal ka yokba dak alaka tanabuba asaya tesadang nungbo shingaia goal magütsüteti tembang.
Oct 21 nüji nikongdang 1:00 ako nungi tenzüka Youth Association Marepkong o Zonipang S/A na final match asayatsü. Iba final match sentong nung Parliamentary Secretary for Labour & Employment, Skill Development & Entrepreneurship, Dr. Neiphrezo Keditsü tongti tesemdanger asütsü jaoka lir.
Oct 20 nü nikongdang 2:00 ako nungi tenzüka MDFA XI o Mokokchung Press Club na exhibition match ka “football for Mokokchung” omen nung ajemdaker Imkongmeren Sports Complex nung asayatsü sentong renema lir.