Iraq aser Kurdish mitkartem kanga sashia rarar

Kirkuk, October 20 (Agencies): Mangatettep aketba tesemtem Iraq mitkartemi agiteter anogo ishika dang lir Kirkuk yimti north tsütsü Kurdish aser Iraq mitkartem tsüngta kanga sashia raradagi.
Alton Kupri nung rocket, artillery aser machine-gun amshia khateper, ta osangbenertemi ashir.
Kirkuk province nung Kurdish Peshmerga telok kübok aliba district rongnung iba district ya tatembangba lir.
2014 küm nungi Kurds temi yimsü süa aruba tesem aika tain hopta Iraq mitkartemi agia arudagi.
Iraq mitkartem aser par tembar mitkartemi iba operation tenzükba ajanga Kurdish telok ya Kurdistan Region of Iraq (KRI)-i atsünga ao.
Kirkuk province nung totzü peria adoker aser iba province nung Kirkuk yimti ya densema lir aser iba tesem ya Baghdad nung aliba central sorkar aser KRI naprongi parnok meying, ta ashir.
Kurdish sorkari referendum agiba nung nüchiso agitsü asoshi nütsüng timbai melungba sülen Iraq Ato Kelonser Haider al-Abadi-i mitkar tashi amshitsü totuyuba agütsü. Iba vote ya metemsü, ta Abadi-i sangdong.
Kiralongrar anema rarartem aser federal police den Iran nunger militia temi Alton Kupri tesem-i 07:30 (04:30 GMT) ako nung ai, ta Iraq mitkar indang odongtar kati ashi.
“Iba tesem nung rara tulu adoka lir aser mitkar indang talongtsütem aser mitkar aika iba tesemleni odagi,” ta osangbener kati iba tesem anasa nungi ashi.
Osang tejangja bo mali saka Iraq indang media department, War Media Cell ajanga ashiba agi, Alton Kupri (Kurdish nungeri Perde, ta ajar) tesem agitetogo.
Iba jila ya Kirkuk province northern tsütsü tatemlen lir aser Kurdish yimtiba Irbil nungi south tsütsü kilometer 50 orr lir.
Iraq court ajanga Kurdistan tatong tir aputsü totuyuba agütsüba sülen iba rara ya tenzüker.
Islamic State (IS) teloki northern Iraq atsüngtetba mapang Peshmerga teloki 2014 küm nungi province aika agitet.