Ao Arangtet Tatidang takok ngua tembangogo

Mokokchung, Oct 20 (TYO): Ao Senden Literature Board (ASLB)-i ayongzüka Ao oshi nung Arangtet Tatidang Oct 18 nungi tenzüka anogo asem nü tashi Mokokchung, Dimapur aser Kohima centre asem lemsar takok ngua agiogo. Taküm iba tatidang agütsür ajak agi nisung 203 (tetsür 162 & tebur 41) liasü.
Mokokchung nung Jubilee Memorial School, Dimapur nung Missionary Hr. Sec. School aser Kohima nung Chandmari Hr. Sec School ta centre asem nung agia liasü.
Arangtet Tatidang telemsaji; under graduate pur AT-I nungi AT-V tashi, graduate pur AT-I nungi AT-III tashi aser Post Graduate pur AT-601 aser AT-701, ta zülua liasü.
ASLB-i riju balala nung tazüngtsü kaket balala menünga adoker, Ao kaketkeno aser oshioben rendaktsüba wadang inyakba den ano tongtibangsa Aor ajaki ozülu (spelling) lirumedema zülutettsü nükla yur ‘Arangtet Tatidang’ ya agia arudaki aser taküm agi joko küm 11 buba agiogo, ta angazüker.
Iba tatidang agiba mapang Mokokchung, Kohima aser Dimapur centre-tem nung ASLB den ano shirnokisa lenmang balala ajanga yaritepogo, parnok ajak dang pelar aser tarutsü nunga Ao kin kaketkeno aser oshioben renlokba maparen ajak nung yariteptsü imlaa atar, ta ASLB tezülur I.Temjen Tzüdir-i metetdaktsü.