Nagaland aser Assam tsüngda arrtsü shitak latettsüla: UNTABA

Dimapur, October 20 (TYO): October 20, 2017 nü Tourist Lodge, Dimapur nung United Naga Tribes Association on Border Areas (UNTABA) lokti senden amen.
Senden nung Nagaland aser Assam tsüngda arrtsüji akhi mapang amshia aruba ama aser official documents nung ajemdaker political level nung latettsü atema takhangba agütsüba nungi masetshitsü bangzünga renem.
Senden nungsa India sorkar, NSCN(IM) nung collective leadership, NNPG inang Working Group, Nagaland sorkar, Naga Hoho, ENPO (Eastern Naga People Organisation), NTC (Nagaland Tribes Council), CNTC (Central Nagaland Tribes Council), IMTN (Indigenous Minority Tribes of Nagaland), NGBF (Nagaland GB Federation), NPMHR (Naga People Movement For Human Rights), NCD (Naga Council Dimapur) aser Nagaland nung Tribe Hoho ajak den ajurutepa sendentem amentsü lemtet.
Linük Temzüng arrla 263 nung aliba ama arrtsü atema Interstate Council ka tentettsü aser Disputed Area Belt ta ajaba tesemtem nung public sendentem amentsü junger ta senden nung adenertemi onük benoka lemsatep, ta Media Cell, UNTABA Secy. Richard Haolai aser General Secretary, Imsumongba Pongen nati sangdong ka nung metetdaktsü.
Nagaland Legislative Assembly nung MLA 60 prongla aser talisa arrtsülen aliba constituency tem nungi MLA temi arrtsü ola madokba aser arrtsü tebilemtsü atema süoki ia mebilemba onük senden nungsa lemsatep.
India sorkari State of Nagaland Act 1962 nung Arrla 3 nung temelenshi kar asütsüba onük nung Nagaland sorkari tamakok anguba atema senden nung adenertemi süoki ia bilema tebilembatem lemsatep.
Senden nung adenertemisa aruba Assembly session mapang sorkar nem draft resolution copy agütsüba nung shia aliba ama Nagaland sorkari resolution ka yanglutsü atema tayongzükba agütsü.