Pakistan ketdangseri Sushma Swaraj ajuru

New Delhi, October 21 (Agencies): Tesüiba ita aika Pakistan aser India na temaba jenjang nung ketdangser senden makai aruba sülen tawa Indian foreign minister, Sushma Swaraj-i Pakistan High Commissioner, Sohail Mahmood ajuruogo, ta Honibarnü ketdangsertem osang ka ajanga metetdaktsü.
Swaraj-i Mahmood den linük ana tesendaktep onük süoka jembi. Taoba ita nung ang Mahmood ya Pakistan’s envoy to India shima liasü.
Swaraj-isa arrtsülen nungi kiralongraba atema India-i tebilemtsü akaba süoka jembiba den külemi Pakistan dang Mumbai aser Pathankot amakertem tekaraba nung pua merenshitsüla, ta ashi.
Osang angazükba agi, tan hopta tetenzüklen Pakistan ketdangser, Mahmood-i Sushma la indang office nung ajuru, aser iba mapang nung Swaraj-i, Pakistan-i Kulbhushan Jadhav dak sendakba onük reprangshitsüla, ta mepishia metetdaktsü.
Kulbhushan Jadhav ya India nunger itangier, ta aija tang Pakistan ket nung lir.
Pakistan aser India na tesendaktep ajungtsü atema Pakistan-i Jadhav nem tai tonglokja aliba ajak agientsüla aser India-i meyipa yoktsüla, ta akhanger.
Tang Jadhav ken o ya International Court of Justice (ICJ)-i angadangdar. Taküm küm tetenzüklen Pakistan military court kati Jadhav nem tasüba temerenshi obendang agüja liasü, ajisüaka ICJ-i tiyongtsüi ia ibaji sota ata.
Mahmood India-i aruba sülen pai tang mezüng Sushma ajuruogo. Paisa National Security Advisor, Ajit Doval aser foreign secretary, S Jaishankar nata ajurutsü, ta osang angazüker.
Diwali benjung nüngtem nung tawa Swaraj-i, Pakistan nunger sensotemi medical visas meshiba ajak agütsütsü, ta sangdonga liasü.
“Deepawli benjungmong nüngtem nung anüngdaka aliba medical Visa angutsü temsüa alir ajak nem India-i agütsütsü,” ta Swaraj-i twitter ajanga metetdakja liasü.
Swaraj-isa Pakistan dang Jadhav semdangtsü atema Pakistan-i aotsü asoshi Jadhav tetsü nem temelaba agütsüdaktsüner, ta ashi.