Islamic State-i mosque amakba atema tenüng agir

Kabul, October 21 (Agencies): Kabul nung Shiite mosque ka amakba atema Islamic State teloki tenüng agiba osang metetdaktsüogo.
Iba lendong nung nisung 39 pokset aser 41 yirua lir, ta Afghan ketdangsertemi Honibarnü metetdaktsü.
Kabul kübok Imam Zaman mosque nung Hokolbar sarasademdang Abu Ammar al-Turkmani-i tekülemer tsüngdang bomb pokdaktsü, ta IS indang website nung metetdaktsü.
Anogo ka nung mosque ana amak aser kaji Ghor province nung aliba Sunni mosque liasü. Iba mosque nunga Hokolbarnü sarasadem sentong agidang lendongji atalok aser nisung 33 pokset, ta provincial chief of police otongdar, Mohammad Iqbal Nizami-i ashi.
Taoba hopta Taliban telungpurtemi tesem aika amak aser lendong balala nung nisung taküm aika laluba mapang ka nung IS-i bomb pokdaktsüba atema tenüng agiogo.
Shiite nungertem amakba atema Islamic State in Afghanistan ta ajaba teloki tenüng agia arur. Afghanistan nung Shiite nunger ya telok tilaba lir aser Sunni telungpur teloktemi parnokji tamangba yimsü menentsürtem ta züngshir.
Taküm küm tetenzüklen IS-i Kabul nung Iraqi Embassy amakba sülen parnoki Afghanistan nung aliba Shiite nunger anema raratsü ta yimyim ayimoktsü.
Honibarnü Interior Ministry-i sangdong ka nung Kabul kübok Dashte-e-Barchi nung atalokba lendong bushisüngdang südar ta metetdaktsü.
Tekülemertemi sarasadem tenzükba mapang nisung kati temang nung bomb bener arua pokdaktsü ta Interior Ministry-isa ashi.
Lendong atalokba mapang mosque nung tekülemer tebur aser tetsürtem aika liasü ta tenük kuli agütsür Ali Mohammad-i osangbener dang ashi.
Dashte-e-Barchi tesem ya Kabul anüolen tsütsü lir aser iba tesem nung Hazaras lisopurtem teimba sür lir. Parnok teimba ka Shiite Muslim tem lir.