Straightway School, Mkg annual Parent’s Day among

Mokokchung, October 21 (TYO): October 21, 2017 nü Straightway School, Mokokchung annual Parent’s Day mongogo; iba sentong nung tongti tesemdangerji Fazl Ali College, Mokokchung Principal, Wt. S. Arenla Lkr liasü.
Sentong nung jembidang lai, ki ya department tabensa aliba mesüka lir, kong tazüokba, tepor ajung, ozüng aser temeim departments sayutetba ajanga lokti atema tagitsü nisung ka kümdaktsür, ta ashi.
Laisa, tangar dak memetaloki, mesüra computer, television aser tutors nem bendanga magütsüi tsüraburtemi khuret bena Tsüngremi moatsüba chirnurtem anitettsüla, ta ashi.
“Tanü tsüraburtemi pei chinur apen-süoshi aser temang nüngdak atema dang bilemja anepalur, ajisüaka tsüraburtemi tanurtemji Tsüngrem metetba nung anitettsü mapang tongogo, kechiyong parnokji Tsüngremi asenok nem agütsüba senmang lir,” ta lai ashi.
Iba school proprietor, Dr. Aotemshi-i school ajanga lokti atema mapa tajung inyakba atema pa dang pelaba olen ka laisa lemsatep.
Tongti tesemdangerisa tesayurtem danga, classroom nung sayuba dak alia tanurtem nem shisatsü agütsütsüla, ta ashi aser tanurtem danga Tsüngrem tsübutsü aser Tsüngremi parnok nem agütsüba sempet amshitsü ayongzüka liasü.
Iba sentong ya Assistant Teacher, Ms. Deepika leniba nung agi aser Administrator, Dr. Awala Temshi-i lokti pelaa agizük. Ano tsüraburtem tenüng nung Visheli-ia jembia liasü. Sentong nungsa Montessori aser Kindergarten tanurtemi sempet balala sayua shilem agi.