Meghalaya nung Regional Democratic Alliance tentet

Shillong, October 21 (Agencies): Meghalaya nung Hills State People’s Democratic Party (HSPDP), United Democratic Party (UDP) aser Garo National Council (GNC) temi Regional Democratic Alliance (RDA) tentetogo.
Meghalaya nung 2018 assembly elections sülen sorkar kümtettsü nükjidong nung iba teloktep tasen tentetogo. UDP-HSPDP-GNC loktepbaji tang mezüng asütsü.
United Democratic Party (UDP) president, Donkupar Roy-i osangbener den jembidang ashiba agi, telok asem longjemba ajanga Meghalaya nung taruba sorkar akümtsü tashi angutsü.
Sorkar akümtsü tashi angutsü atema Khasi-Jaintia Hills tesem nung HSPDP aser UDP na tsüngda menden lemsatsü telemtetba agiogo. Ano külen, UDP-i taoba mapang nungi Garo Hills nung amenoka aliba GNC den tesentaktep yanglua lir.
UDP-i Garo Hills nungi menden 12 nung tokteptsü sentong lir.
UDP-HSPDP teloktepji Congress den miima angatettepa inyakba mapa ka lir ta nisungtemi jembiba atema Roy-i, “iba teloktep ya elections nung menden aika takok angutsü atema lir” ta ashi.