Multi-crore advertisement scam nung nisung 5 aitsü

Guwahati, October 22 (Agencies): Assam Information and public relations department director dena parnok pongu multi-crore rupee advertisement scam nung aitsüogo.
Chief Minister Sarbananda Sonowal, special vigilance cell-i Honibarnü sen crore 30 mashikoshi amshiba ken o dak sendakba nung okadak FIR ka benokogo.
Director Ranjit Gogoi dak alaka advertising aser media firm asem nungi; Rajib Bora aser Anjana Bora na Brahmaputra Television Network, Delta Publicity nungi Dilip Kalita aser Pradip Advertising nungi Apurba Lahkar nunger tenüng iba FIR nung aibelenertem ama shisema lir.
Bushisüngdang ajanga ngutetba agi, state nung taoba Congress sorkar mapang Gogoi-i ‘Vision Assam, Mission Assam’ publicity campaign nung shilem ka ama project tem atema temelaba agütsüba mapang nung pa tashi amshi.
Iba campaign ya Tarun Gogoi-i aniba sorkar yimsüsüba tasembuba term tatemi ayongzüka aka koba parnoki 2016 assembly election matong tsüngda media balala ajanga parnok takoktem sayutsüba nükjidong nung tenzük.
Ajisüaka parnoki iba campaign atema sen agütsüba nungi tajangzük angutsü mechi nung advertisements aser coverage jenjang kanga ajungketa teyazü yangluba ngutet.
Iba campaign atema temelaba agütsüba aser sen agütsüba yimya nung aibelen reprangteta BJP-i aniba sorkari iba ken o ya April ita nungi tenzüka bushisüngdanga arudar.
Vigilance cell ketdangsertemi information department office aser FIR nung shisema aliba firm tem office meita ogo aser iba ken o nung sendaka aliba nisungtem danga tasüngdangtsü tim asüngdangogo.
Iba ken o ya Indian Penal Code aser Prevention of Corruption Act for criminal conspiracy, forgery, criminal breach of trust, cheating, kübok section aika nung aija benoka lir.