Naga Framework Agreement ajanga Assam litsü mekongshitsü: CM Sonowal

Dibrugarh, October 22 (Agencies): Assam state sorkari litsü kümzüka ayutsü, ta Chief minister Sarbananda Sonowal-i nenshia metetdaktsü.
Centre-i 2015 küm National Socialist Council of Nagaland (Isak-Muivah) den Framework Agreement agiba ajanga Assam litsü nung kongshitsü akok ta tsübua bilemba tangatetba agientsü atema Sonowal-i iba onük jembi.
Honibarnü Charaideo district kübok Sonari nung ali patta lema agütsüba sentong ka nung o jembidang, Sonowal-i “Nagalim indang onük atema shisabulua bilemtsü nüngdak madoker. Kechi ajurudir ajuruaka onoki Assam indang litsü kümzüka ayutsü. Onoki Nagaland nem asen lushi magütsütsü. Asen litsü kümzüka lir anungji nübortemi tsübua mebilemtsüla” ta ashi.
August 3, 2015 nü Centre aser NSCN (IM) tsüngda Framework Agreement agiba Assam arrtsü nung kongshitsü akok ta public-i arentaka bilemer, kechiyong Centre-i iba tenangzüktep nung keta aliba onüktem yimjak nung memetetdaktsüi lir.
NSCN (I-M)-i tongti süa akhangbaji Nagalim mesüra Greater Nagaland tentettsü aser ibaji Assam, Manipur aser Arunachal Pradesh nung Naga nunger aliba lushi ajak dener tentettsüba lir. Ajisüaka, state asempronglai parnok lushi nung mekongshidaktsütsü aser arrtsü melenshitsüsa inyakba mapa ajak anema nokdaktsü ta akangkanga metetdaktsüogo.
Framework Agreement ajanga Naga nung aliba tesemtem ajak lokteptsü mulunga agizüker, ta NSCN (IM) tanishirtemi ashir.
Greater Nagaland nung Assam, Manipur aser Arunachal Pradesh nungi ali tasazük 1.3 lakh square km shi adentsü ta parnoki ashir.
Nisung aikati Framework Agreement nung aliba onüktem yimjak nung metetdaktsütsü takhangba agüja arur. Iba atema Union minister of state for home Kiren Rijiju-i taküm March 15 nü Rajya Sabha nung, “tatembang telemtetba ka agitsü atema tangang mapa teinyakdak lir anungji Framework Agreement ji tangbo yimjak nung memetetdaktsütsü” ta shia liasü.