Odisha nung Maoists-i BSF 3 densema nisung pezü tepset

Malkangiri (Odisha), August 26 (Agencies): Tanü Odisha, Malkangiri district nung aliba arem ka nung Maoists telungpurtemi ali telung nung bomb pokdaktsüba sülen paramilitary sepaitem amakba mapang BSF sepai asem den civilian ka densema süogo aser tangar trok yiruogo.

Tanep 7:30 meta BSF 104 buba battalion sepaitemji Malkangiri district nung aliba parnok indang Janbai base anasa lia Maoists telungpurtemi ali telung nung rema toktsüba bomb amshia amak, ta BSP ketdangser kati ashi.

“Iba amakba lendong nung Assistant Sub-inspector, Head Constable aser Constable ka süogo aser yirua alir par trok rongnung Company commander Assistant Commandant Ashok Kumar densema liasü,” ta ketdangserisa ashi.

Ketdangsertemi ashiba agi, iba lendong nung civilian kata asü aser iba tatalokba sülen BSF commander tem iba tesem jagi ao.

“Yirua alisang ketdangserji nükjang ka samaogo. Pa den tangartemji Malkangiri nung aliba sorkar district hospital-i anir oa yaridagi,” ta parnokisa ashi.

Telungpurtemji mita aotsü asoshi BSF sepaitem iba tesem jagi yokogo. Tanep sepaitemji telungpur mita aodang iba lendong ajuru.

Janbai base camp nungi BSF sepai telok ka Gurupriya apu yangluba tesemi aoba mapang Chitrakonda reservoir nung rong ka ajanga Chintamdoli ghat atong, ta Inspector In-Charge, Chitrakonda police station Pitabas Dharua-i ashi.

Sepaitemji Chintamdoli ghat tongli bomb ji apok, iba sülen Maoists telungpur kari injang kahloktsü, ta paisa ashi.

Yirua alir BSF sepai trokji district headquarters hospital nung yaridagi aser parnok rongnung par asembo kanga mejungi yirua lir, ta Inspector In-Charge, Malkangiri PS, R K Das-i ashi.