NSLSA refresher training nung PLVs 68 adener

Kohima, October 25 (TYO): Nagaland kübok district 11 nungi Paralegal Volunteers (PLVs) 68 tashi anogo asemnü refreshers training nung dendar.
Iba sentong ya Nagaland State Legal Services Authority (NSLSA)-i SIRD Hall, Kohima nung ayongzüka agir.
Sentong nung Gauhati High Court judge aser Executive Chairman NSLSA, Justice L S Jamir-i okila jembidang, PLV indang mapa tongtipangji teküpoktiba jenjang tashi alutsü aser parnok temeden angutsü atema yariteptsüba lir, ta ashi.
“PLV temi maongkatem ataa mekazüla, saka loktiliba nung legal aid nüngdakbapurtem yaritsü atema tejakleni aotsüla” ta paisa ayongzük.
State Legal Services Authority atema PLV temji tongtiret lir anungji nenok indang mangdangji nübortem taginüba tongtsütsü aser yaritsü atema asütsüla, ta Justice L S Jamir-isa shisem.
Sentong nung Member Secretary NSLSA, Nino Iralu-ia ashiba agi, refresher training nung constitutional rights aser welfare scheme balala atema kechi inyak nung ajungtsü ta asüba onüktem lemsateptsü.
Anogo asemnü training nung Nodal Departments, NGO aser Master Trainer temi welfare schemes aser provisions indang onüktem jembitsü.